„რა არის ლაჩრობა?“ – იკითხეს დღეს, 17 ივნისს აჭარის მთავრობის ადმინისტრაციულ შენობასთან შეკრებილმა ომის ვეტერანებმა. მათ თორნიკე რიჟვაძეს თანამდებობის დატოვება და ბოდიშის მოხდა მოსთხოვეს მისი ცნობილი განცხადებისთვის: „ლაჩრულად წაგებული ომი“.
15 ივნისს, აჭარის უმაღლეს საბჭოში თორნიკე რიჟვაძემ ოპოზიციის მიერ რუსეთის მოქალაქეების საქართველოში შემოსვლის გაზრდილ მაჩვენებელზე დასმული კითხვის პასუხად თქვა: „…გაორმაგებულია როგორც ვიზიტორების რაოდენობა, ასევე, შემოსავლების მოცულობა და მინდა გითხრათ, რომ ამ საერთო ხვედრით წილში მათ შორის იმ ქვეყნის მოქალაქეებიცაა, რომლებსაც 2008 წელს, ლაჩრულად წაგებული ომის შემდგომ, სააკაშვილის ხელისუფლებამ მწვანე აუნთო, უვიზო რეჟიმი დაუწესა და ყვავილებით, ქართული ღვინით ხელში ეგებებოდა“.
„რა არის ლაჩრობა, მე ვეკითხები მას, სოხუმის ზომის ტერიტორია დაიკარგა 2012 წლის შემდეგ, მცოცავი ოკუპაციის დროს და სიტყვა არ ამოუღიათ. ესაა ლაჩრობა თუ ის, როცა ებრძვი მტერს ღირსეულად და გადაარჩენ ქვეყანას?“ – იკითხა ბესიკ ქათამაძემ, ის 2008 წლის აგვისტოს ომის მონაწილეა და თორნიკე რიჟვაძესთან ითხოვდა შეხვედრა ომის სხვა ვეტერანებთან ერთად.
„მიაძინეს ქვეყნის მთავარი პრობლემა – ქვეყნის ოკუპაცია. მათი ბრძოლის მთავარი სამიზნეა სააკაშვილი და ნაცმოძრაობა… პარტიები წავლენ და წამოვლენ, ასეთი ლაჩრული განცხადება კი, გმირებთან, მებრძოლებთან დაკავშირებით არ უნდა დავუშვათ,“ – გვითხრა ბესიკ ქათამაძემ.
2008 წლის აგვისტოს ომის ვეტერანებს აჭარის მთავრობის თავმჯდომარე არ შეხვდა
„როგორ ბედავს და ამბობს ამას, რომ ხართ ლაჩრები? სად იყო თვითონ 2008 წელს? მე 21 წლის ვიყავი მაშინ და ვომობდი… ომს გმირები ეწირებიან და რიჟვაძის მსგავსი პირები მართავენ შემდეგ ქვეყანას.
არაფერ შუაშია აქ პოლიტიკა. ვინც არ უნდა ყოფილიყო პრეზიდენტი, ვიომებდით. ახლაც რომ შემოვიდეს რუსეთი, ივანიშვილს დავუდგებით გვერდით და ვიომებთ,“ – აღნიშნა არჩილ ჯაფარიძემ.
ვეტერანებმა ყურადღება გაამახვილეს თორნიკე რიჟვაძის ფეისბუქში გაკეთებულ განმარტებაზეც: „ჩვენი ჯარისკაცები გმირები არიან, იყვნენ და იქნებიან, ლაჩარი თქვენი ბელადი სააკაშვილია“. ომის მონაწილეების აზრით, ეს განცხადებაც მიუღებელია, რადგან მიხეილ სააკაშვილი აგვისტოს ომის დროს მთავარსარდალი იყო.
„პუტინის დიქტატურას დაუპირისპირდა სულ სამი ქვეყნის ლიდერი: ჯოხარ დუდაევი, მიხეილ სააკაშვილი და ზელენსკი. როგორ არ შეიძლება იამაყო ასეთ კაცთან ერთად ბრძოლი?“ – იკითხა არჩილ ჯაფარიძემ.
„როცა პრეზიდენტს ომის კონტექსტში ახსენებ, ის იყო მაშინ მთავარსარდალი, სამხედრო ძალების შემადგენელი კომპონენტი. არ აქვს მნიშვნელობა, ჯარის რომელ კომპონენტს აყენებ შეურაცხყოფას – ერთიან ჯარს აყენებ შეურაცხყოფას,“ – მიიჩნევს მიხეილ მარგალიტაძე, ის თადარიგის კაპიტანია, ომის და სამხედრო ძალების ვეტერანი.
„მე მინდოდა თორნიკე რიჟვაძესთან შეხვედრა. მაინტერესებდა, იგივეს თუ გაიმეორებდა ჩვენთან. მან უნდა მოიხადოს ბოდიში ჩვენს წინაშე კი არა, არამედ იმ გმირების წინაშე, ვინც თავი შესწირა ჩვენი ქვეყნის ერთიანობისთვის ბრძოლას,“ – გვითხრა მიხეილ მარგალიტაძემ.
ომის ვეტერანებს აჭარის მთავრობის თავმჯდომარე არ შეხვდა.
