მთავარი,სიახლეები

უკრაინის კონტრშეტევა – რას წერს ანგარიშში ომის კვლევის ამერიკული ინსტიტუტი

16.06.2023 • 2438
უკრაინის კონტრშეტევა – რას წერს ანგარიშში ომის კვლევის ამერიკული ინსტიტუტი

უკრაინული ძალები განაგრძობენ კონტრშეტევითი ოპერაციებს სულ მცირე სამი მიმართულებით და, გავრცელებული ინფორმაციით, 15 ივნისს მიაღწიეს წარმატებას – წერს ომის კვლევის ამერიკული ინსტიტუტი [ISW] 15 ივნისის ანგარიშში.

ანალიტიკოსები ანგარიშის მომზადებისას ეყრდნობიან უკრაინულ და რუსულ ღია წყაროებს. ახალი ანგარიშის თანახმად, უკრაინის გენერალური შტაბის პრესსპიკერმა განაცხადა, რომ უკრაინულმა ძალებმა წარმატებით ჩაატარეს შეტევითი ოპერაციები ბახმუტის ჩრდილოეთით და ჩრდილო-დასავლეთით.

ასევე, უკრაინული მხარის ცნობით, უკრაინული ძალები დასავლეთ დონეცკის ოლქში ერთ კილომეტრამდე დაწინაურდნენ და აგრძელებენ მცდელობებს გააუმჯობესონ ტაქტიკური პოზიციები ვუჰლედართან, დონეცკის სამხრეთ-დასავლეთით 30 კმ-ზე.

ასევე, უკრაინის გენერალური შტაბის მთავარი ოპერატიული დეპარტამენტის უფროსის მოადგილემ განაცხადა, რომ უკრაინული ძალები 3 კმ-მდე დაწინაურდნენ დასავლეთ ზაპოროჟიეს ოლქში. 7 კილომეტრამდე – ველიკა ნოვოსილკას დასავლეთით, დონეცკის ოლქში და გაათავისუფლეს შვიდი დასახლება კონტრშეტევითი ოპერაციების დაწყებიდან დღემდე.

ანალიტიკოსებს ანგარიშში ასევე მოჰყავთ უკრაინის პრეზიდენტის ოფისის მრჩევლის, მიხაილო პოდოლიაკის 15 ივნისის განცხადება, რომელმაც თქვა, რომ უკრაინულ ძალებს ჯერ არ დაუწყიათ კონტრშეტევა „როგორც ასეთი“. ეს, სავარაუდოდ, მიუთითებს, რომ უკრაინულ ძალებს ჯერ არ დაუხარჯავთ ძირითადი ძალისხმევა.

თავის მხრივ რუსი ბლოგერები წერენ, რომ უკრაინული ჯარები წარუმატებლად დაესხნენ თავს რუსულ არმიას ორეხოვის სამხრეთ-დასავლეთით ზაპოროჟიეს ოლქში და აცხადებენ, რომ უკრაინული ძალები აძლიერებენ კონტრშეტევითი ოპერაციების ტემპს ამ მხარეში ამინდის გაუმჯობესების შესაბამისად.

ISW-ს შეფასებით, მიმდინარე შეტევითი ოპერაციები, სავარაუდოდ, ქმნის პირობებს უკრაინული კონტრშეტევის მიზნებისთვის, რომლებიც არ არის ნათელი და, შესაბამისად, წარმოადგენს მიმდინარე კონტრშეტევის საწყის ფაზას.

ISW ასევე წერს, რომ დასავლეთის სახელმწიფოებმა შესაძლოა უახლოეს თვეებში უკრაინას მიაწოდონ F-16 გამანადგურებლები და დამატებით ტანკი „ლეოპარდები“. ნატოს გენერალურმა მდივანმა სტოლტენბერგმა 15 ივნისს განაცხადა, რომ უკრაინელი მფრინავები უკვე ვარჯიშობენ F-16 თვითმფრინავებზე.

გადაბეჭდვის წესი


ასევე: