დღევანდელ სხდომაზე არაფერი უთქვამს პოლიციელს, ვიტალი ზოიძეს, რომელიც გამოძიების ვერსიით, ზებრაზე ორ ქვეითს დაეჯახა. ის ნასვამი მართავდა ავტომანქანას.
ავარიის შედეგად ერთი დაშავებული დაიღუპა, მეორეს მდგომარეობა ისევ მძიმეა, ის რეანიმაციაში რჩება.
დაშავებულები ძმები იყვნენ ბელარუსიდან. გარდაცვლილი 35 წლის იყო, მძიმედ დაშავებული კი, 26 წლისაა.
მოსამართლე ლევან ყოლბაიამ წინასწარი პატიმრობა შეუფარდა საპატრულო პოლიციის თანამშრომელს, ვიტალი ზოიძეს. მას გამოძიება ავტოსაგზაო მოძრაობის უსაფრთხოების წესების დარღვევას ედავება, რამაც ადამიანის სიცოცხლის მოსპობა გამოიწვია, ასევე ჯანმრთელობის მძიმე დაზიანება (სსკ-ის 276-ე მუხლის მე-5 და მე-7 ნაწილები).
საუბარია 13 ივნისს, ბათუმში, სასტუმრო „ეუფორიასთან“ მომხდარ შემთხვევაზე – ავტომანქანა ორ ქვეითს დაეჯახა.
პროკურატურის ვერსიით, პოლიციელი იმ საღამოს საჭესთან ნასვამი იყო, იგი ამ დროს სამსახურებრივ უფლებამოსილებას არ ასრულებდა.
ბრალის დადასტურების შემთხვევაში, პოლიციელს 6-დან 9 წლამდე თავისუფლების აღკვეთა ელის.
ეს პოლიციელი, რომელიც ახლა ბრალდებულია, სასამართლოში ხშირად წარმოადგენდა შსს-ს, მაგალითად, საპროტესტო აქციებზე მოქალაქეების ადმინისტრაციული დაკავების დროს.
ვიტალი ზოიძე იყო შსს-ს წარმომადგენელო ასევე „24 ოპოზიციონერის საქმეზე“, როცა დეპუტატებსაც კი, კარვები დაუშალეს, ჩამოართვეს, დააკავეს, შემდეგ კი უმტკიცებდნენ, რომ კანონი დაარღვიეს.
მანამდე კი, ვიტალი ზოიძე სასამართლოს მანდატური იყო.
ადვოკატმა ირაკლი აბაშიძემ სხდომაზე ბრალდებული პოლიციელის გირაოთი გათავისუფლება მოითხოვა 20 ათასი ლარის სანაცვლოდ.
„ის შემთხვევის ადგილიდან არსად მიმალულა, თვითონ ცდილობდა დაშავებულებს დახმარებოდა… არასდროს ჰქონია კონფლიქტი სამართალდამცველებთან. როგორ შეიძლება ვივარაუდოთ, რომ ის მიემალება მართლმსაჯულებას?“ – იკითხა ადვოკატმა ირაკლი აბაშიძემ.
„ეს ზეპირი განცხადებებია. დაზარალებულის დედის გამოკითხვაც ჯერ ვერ მოხერხდა, ისეთი ემოციური ფონი აქვს“, – თქვა პროკურორმა და მერე ვრცლად ისაუბრა იმაზე, თუ რას ნიშნავს, როცა ნასვამი პოლიციელი თავად ჯდება საჭესთან.
პოლიციელი ეთანხმება ბრალს. ადვოკატ ირაკლი აბაშიძის თქმით, დაწყებულია მოლაპარაკება საპროცესო შეთანხმებისთვის
