მეათე თვეა რუსეთის საოკუპაციო ძალები ცდილობენ ქალაქის აღებას, თუმცა მათ ეს სრულად ვერ შეძლეს. ბოლო დღეებში, უკრაინული მხარის ცნობით, უკრაინელმა მებრძოლებმა ბახმუტის მიმართულებით ეფექტური კონტრშეტევების განხორციელება შეძლეს.
უკრაინული მედია უკრაინის შეიარაღებული ძალების აღმოსავლეთ ჯგუფის სპიკერზე, სერხი ჩერევატზე დაყრდნობით, წერს, რომ გასულ 24 საათში უკრაინელმა ჯარისკაცებმა 500 მეტრამდე წინსვლა შეძლეს ბახმუტის ფრონტის სხვადასხვა მონაკვეთზე.
„მტერმა 456-ჯერ ესროლა ჩვენს პოზიციებს სხვადასხვა კალიბრიდან და სხვადასხვა ტიპის არტილერიიდან, რითაც დაადასტურა, რომ სინამდვილეში ჭურვების ნაკლებობა არ აქვს, სამწუხაროდ. ამ მიმართულებაზე 25 შეტაკება და 12 საჰაერო იერიში მოხდა. 107 ოკუპანტი განადგურდა, 153 – დაიჭრა“ – თქვა მან.
ჩერევატიმ დაადასტურა უკრაინის სახმელეთო ჯარების მეთაურის, სირსკის სიტყვები, რომ „ვაგნერის“ ბოევიკები „ბახმუტში შეძვრნენ, როგორც ვირთხები ხაფანგში“. მისი თქმით, ოკუპანტებს ესმით, რომ ვერაფერს შეცვლიან, მაგრამ არ წყვეტენ ქალაქის აღების მცდელობას.
„ამავდროულად, ისინი ხვდებიან, რომ ინიციატივა თანდათან ჩვენს მხარეს გადმოდის. არ გვყავს დიდი რაოდენობით რეზერვები, არ გვქონდა მტერზე უპირატესობა აღჭურვილობითა და პერსონალით, მაგრამ, მიუხედავად ამისა, ჩვენ წარმატებულად ვატარებთ თავდაცვით ოპერაციას და დროდადრო მტერს ვუტევთ“ – განაცხადა ჩერევატიმ.
________
ფოტო: EPA-EFE/Maria Senovilla
