ძველ ბათუმში ძეგლს დააშენეს – ნებართვა კულტურული მემკვიდრეობის სააგენტომ გასცა

„აუცილებლად დაათვალიერე ძველ ბათუმში კოპწია აივნები“ – ურჩევს აჭარის ტურიზმის დეპარტამენტი ფეისბუქზე ქალაქის სტუმრებს და ამ „კოპწია აივნების“ ფოტოს აქვეყნებს. ძველი ბათუმის არქიტექტურა, თავისი აივნებით, ერთ-ერთი ყველაზე მომხიბვლელი დეტალია ბათუმში ტურისტებისთვის იმ გამოკითხვების მიხედვით, რაც ამ დრომდე „ბათუმელების“ არქივში დაგროვდა.

თუმცა ასეთ მოწოდებას ალბათ უკვე კიდევ ერთი მინაწერი სჭირდება, მაგალითად, ასეთი:

„ამ კოპწია აივნების დათვალიერებისას ზემოთ არ აიხედოთ, ახლახან დაშენებულ სართულს ყურადღებას ნუ მიაქცევთ – საინტერესო არაფერია.“

ზუსტად იმ სახლს, კულტურული მემკვიდრეობის ძეგლს, რომლის კოპწია აივნების ფოტოც აჭარის ტურიზმის დეპარტამენტმა „ბათუმობაზე“ დასაპატიჟებლად გამოიყენა, ცოტა ხნის წინ სართული დააშენეს. შენობა კერძო საკუთრებაა.

როგორც პრესსამსახურში გვითხრეს, მშენებლობაზე ნებართვა აჭარის კულტურული მემკვიდრეობის დაცვის სააგენტომ გასცა, უწყებამ, რომელსაც ძეგლების დაცვა კულტურული მემკვიდრეობის დაცვის შესახებ კანონის შესაბამისად ევალება და არა შერჩევით და ისე, როგორც თავად მიაჩნია საჭიროდ.

კულტურული მემკვიდრეობის ეროვნული სააგენტოს ვებგვერდზე გამოქვეყნებული ინფორმაციის თანახმად, ბათუმში, მემედ აბაშიძის #9-ში მდებარე შენობა XX საუკუნის დასაწყისშია აშენებული. ის ერთ დროს სასტუმრო „რივიერა“ იყო, რომლის მეპატრონეც ვინმე იოსიფიდი ყოფილა. სახლში გარკვეული პერიოდი [1918-21 წ.] უცხოვრია საზოგადო მოღვაწე მემედ აბაშიძეს. 1992 წლიდან შენობის ნაწილში მისი სახელობის სახლ-მუზეუმი ფუნქციონირებს.

სპეციალისტების დახასიათებით, ორსართულიანი შენობა კლასიცისტურ-ბაროკოულ სტილშია გადაწყვეტილი. ის თავისი პროპორციითა და გაბარიტით ქუჩის მჭიდრო განაშენიანებაში მნიშვნელოვან როლს თამაშობს. ასევე გამოირჩევა მაღალი სამშენებლო ოსტატობითა და დეკორატიული ელემენტების დახვეწილი გამოყენებით.

ფოტო: Visit Batumi – აჭარის ტურიზმისა და კურორტების დეპარტამენტის გვერდი ფეისბუქზე

ძველი ბათუმის არსებული იერსახით შენარჩუნებას აჭარის მთავრობის თავმჯდომარე თორნიკე რიჟვაძე საზოგადოებას არაერთხელ დაჰპირდა, თუმცა უშედეგოდ. ძველ ბათუმში ძეგლების იერსახის შეცვლას მაინც ახერხებენ. აჭარის კულტურული მემკვიდრეობის დაცვის სააგენტო, აჭარის მთავრობის საქვეუწყებო დაწესებულება, რომელსაც ძეგლების მოვლა ევალება, არათუ მათ შენარჩუნებას ავთენტური სახით ვერ ახერხებს, არამედ თავად გასცემს ძეგლზე დაშენების ნებართვას.

ბათუმი, მემედ აბაშიძის ქუჩა #7. დაშენება სახლზე.

ძველი ბათუმის არსებული იერსახით შენარჩუნებაზე თორნიკე რიჟვაძემ ბოლოს 2022 წლის აგვისტოში ისაუბრა. მაშინ მთავრობის თავმჯდომარემ კიდევ ერთხელ განმარტა, რომ ძველ ბათუმში მშენებლობაზე მორატორიუმი შენარჩუნდებოდა, უახლოეს მომავალში კი რეაბილიტაცია-აღდგენის პროცესის დაწყებას გეგმავდნენ.

„საზოგადოებისთვის კიდევ ერთხელ მსურს განვმარტო, რომ ძველ ბათუმთან დაკავშირებით, ჩვენთვის უაღრესად მნიშვნელოვანია იერ-სახის, კულტურული მემკვიდრეობის ძეგლების შენარჩუნება, მათი მოვლა. ამიტომ კიდევ ერთხელ განვმარტავ, რომ ეს ცვლილებები არ ეხება ძველ ბათუმს. შენარჩუნდება მორატორიუმის რეჟიმი, მოხდება მხოლოდ ძეგლების რეაბილიტაცია კანონმდებლობით დასაშვებ ნორმებსა და ფარგლებში.“ – განაცხადა მაშინ რიჟვაძემ.

ამავე თემაზე: 

რიჟვაძე პირობას დებს, რომ დაიწყება ძველი ბათუმის რეაბილიტაცია