ქობულეთში, კომპანია „შავი ზღვის სამოთხე 1“ აბაშიძის ქუჩაზე, ზღვის სანაპიროსთან, 53 და 23-30-სართულიანი აპარტოტელების აშენებას გეგმავს.
დაახლოებით 20 ჰექტარი ტერიტორია, სადაც ახალი პროექტი უნდა განხორციელდეს, ავტომაგისტრალსა და ზღვას შორის მდებარეობს და ის მთავრობამ 26,6 მილიონ ლარად, პირობებით გაყიდა.
ამავე ნაკვეთთან კომპანიას 45-წლიანი იჯარით 45 306 კვადრატული მეტრი პლაჟიც გადასცეს.
ქობულეთის მერიამ სტრატეგიული გარემოსდაცვითი შეფასების [სგშ] ჩატარების საჭიროების დადგენის მიზნით, გარემოს ეროვნულ სააგენტოში 2023 წლის 2 მაისს „შავი ზღვის სამოთხე 1“-ის საკუთრებაში არსებული ნაკვეთის განაშენიანების დეტალური გეგმის კონცეფცია და სკრინინგის განცხადება წარადგინა.
დოკუმენტების მიხედვით, „კონცეპტუალურად პროექტი დაყოფილია რამდენიმე განსხვავებული ტიპის შენობებად და ჯგუფებად:
- დომინანტს წარმოადგენს სანაპირო ზოლთან დაგეგმილი 53-სართულიანი აპარტოტელი.
- ტერიტორიაზე ასევე განთავსდება 23-30-სართულიანი ხუთი აპარტოტელის ტიპის შენობა, ორი სანაპირო ზოლის სიახლოვეს და სამი – უკანა ზოლზე, საავტომობილო გზის სიახლოვეს.
- ყველა ჩამოთვლილ მაღლივ შენობას ექნება თავისი საცურაო აუზები და მცირე სპორტული ინფრასტრუქტურა.
- კომპლექსის შუა ნაწილი სანაპირო ზოლზე დაეთმობა ბრენდულ, 5-ვარსკვლავიან სასტუმროს, რომლის სართულიანობა შეადგენს 7-8 სართულს.
- კომპლექსის შუაგულში განთავსდება საშუალო ინტენსივობის საცხოვრებელი სახლების ჯგუფები, ჯამში 8 ჯგუფი, რომელთა სართულიანობა ცვალებადია 4-დან 8 სართულამდე. ყოველ ჯგუფს ექნება თავისი საცურაო აუზი და გამწვანებული ეზო. ამ ჯგუფში შემავალი შენობების საერთო რაოდენობა იქნება 36.
- საპროექტო ტერიტორიისთვის მოეწყობა შესაბამისი საინჟინრო კომუნიკაციები [ელმომარაგება, გაზმომარაგება, საკანალიზაციო სისტემა, წყალმომარაგება და სხვა]“.
ტურისტული კომპლექსის ვიზუალიზაცია / ფოტოები სკრინინგის ანგარიშიდან
აღნიშნულ პროექტთან დაკავშირებული წერილობითი შენიშვნები და მოსაზრებები დაინტერესებულ პირებს შეუძლიათ გარემოს ეროვნულ სააგენტოს 2023 წლის 16 მაისის ჩათვლით წარუდგინონ, მათ შორის ელექტრონული ფოსტის მისამართზე: eia@mepa.gov.ge
დოკუმენტებიდან ირკვევა, რომ საპროექტო ტერიტორიას კვეთს „საქართველოს მელიორაციის“ კუთვნილი დეხვა-ბობოყვათის დამშრობი სისტემის არხების დაბოლოების ნაწილი. აღნიშნული არხების სისტემით [საერთო სიგრძე: 6146.59 მ] შეკრებილი წყალი გაედინება საპროექტო ტერიტორიაზე და ჩაედინება შავი ზღვის სანაპირო ზოლის ქვიშა-ხრეშოვან ნაწილში.
„არხის ორივე მხარეს 6-6 გრძივი მეტრ საპროექტო ტერიტორიაზე დატვირთულია სერვიტუტით [11 408 კვ.მ]. პროექტის განხორციელებისას აღნიშნული საკითხები მხედველობაში იქნება მიღებული, რაც გულისხმობს შესაბამისი კანონით დაგეგმილი მოთხოვნების განხორციელებას“, – აღნიშნულია სკრინინგის დოკუმენტში.
საპროექტო ტერიტორია და იჯარით გაცემული პლაჟი ქობულეთში / ფოტო სკრინინგის დოკუმენტებიდან
შპს „შავი ზღვის სამოთხე 1“ 2022 წლის 21 ივლისში დაარეგისტრირეს. კომპანიის წილებს ფლობენ: გიორგი გარის სვანიძე [ორმაგი მოქალაქე: საქართველო, ნიდერლანდები] – 35%, მანანა სირაძე – 35%, დავით თოფურიძე – 15%, ალხუნაიზი ტაისიერ ბაქირ ჰ, რომელიც რეესტრის ამონაწერით, მითითებულია, როგორც არაბთა გაერთიანებული საემიროების მოქალაქე, თუმცა პასპორტის მიხედვით ის საუდის არაბეთის სამეფოს მოქალაქეა – 15%. კომპანიის დირექტორია გივი ნემსაძე.
ბობოყვათის სანაპიროს გასხვისებას ადგილობრივი მოსახლეობა აპროტესტებდა. ისინი აცხადებენ, რომ ნაკვეთი მათი ტრადიციული საკუთრებაა, თუმცა მთავრობამ ის მათ საკუთრებაში არ დაურეგისტრირა.
ამ საკითხთან დაკავშირებით ქონების ეროვნულ სააგენტოში ამბობენ, რომ „მიწის ნაკვეთი წარმოადგენდა სახელმწიფო საკუთრებას და საუბარი იმაზე, რომ პრივატიზებული მიწა კერძო საკუთრებას წარმოადგენდა, არის საზოგადოების შეცდომაში შეყვანა.“
ამავე თემაზე ვრცლად:
მთავრობამ ბობოყვათის სანაპიროზე 19 ჰექტარი გაყიდა, პლაჟი კი 45 წლით გაასხვისა
