„უკრაინელმა მებრძოლებმა ბახმუტში კონტრშეტევის შედეგად აიძულეს მტერი დაეტოვებინათ ზოგიერთი პოზიცია“ – ამის შესახებ უკრაინული მედია წერს უკრაინის თავდაცვის აღმოსავლეთის ძალების ჯგუფის მეთაურის, ალექსანდრე სირსკის განცხადებაზე დაყრდნობით.
„წინსვლისთვის მტერი იყენებს მაქსიმალურ ძალისხმევას და არაფერს ითვალისწინებს. მნიშვნელოვანი დანაკარგების მიუხედავად, „ვაგნერის“ ახალი, მოიერიშე და სხვა კომპანიების ჯგუფები ერთვებიან ბრძოლაში, მაგრამ მტერი ვერ ახერხებს ქალაქის [ბახმუტის] კონტროლს.
სიტუაცია საკმაოდ რთულია. ამასთან, ქალაქის ზოგიერთ მონაკვეთში ჩვენი ქვედანაყოფების კონტრშეტევის შედეგად მტერმა დატოვა რამდენიმე პოზიცია“ – ციტირებს „უკრაინსკაია პრავდა“ სირსკის.
სირსკის თქმით, ინტენსიური საომარი მოქმედებები გრძელდება ბახმუტის მიმართულებით, მაგრამ მტერმა ჯერ ვერ შეძლო უკრაინის დაცვის პოზიციების გარღვევა.
ასევე, უკრაინული მედიის ცნობით, ლიმანის მიმართულებით უკრაინელმა მებრძოლებმა ბოლო რამდენიმე დღის განმავლობაში არაერთი თავდასხმა მოიგერიეს. რუსეთის საოკუპაციო ძალებმა ასევე ვერ შეძლეს უკრაინული პოზიციების დაკავება, უკრაინის ძალებმა კი 10 ოკუპანტი ტყვედ აიყვანეს.
