ბუქარესტში მიმდინარე შავი ზღვის უსაფრთხოების კონფერენციაზე უკრაინის საგარეო საქმეთა მინისტრმა დმიტრო კულებამ განაცხადა, რომ საჭიროა ყოვლისმომცველი უსაფრთხოების სტრატეგია შავი ზღვის რეგიონის ქვეყნებისთვის და შავი ზღვა ნატოს ზღვა უნდა გახდეს, ისე, როგორც ნატოს გახდა ბალტიის ზღვა.
კულებას თქმით, შავი ზღვა არის მაგალითი იმისა, თუ რამდენად სწრაფად შეიძლება გაუარესდეს სიტუაცია, თუკი მოხდება რუსეთიდან მომდინარე საფრთხეების იგნორირება.
„საქართველო, უკრაინა, სირია და ისევ უკრაინა – მოსკოვი ახორციელებდა სასტიკ თავდასხმებს ერთი მეორის მიყოლებით. დასავლეთში ბევრმა გადაწყვიტა დაეჯერებინა, რომ რუსებს ჰქონდათ „საკუთარი სიმართლე“. მაგრამ ერთადერთი სიმართლე არის ის, რომ რუსეთი ყოველთვის ემზადებოდა დიდი იმპერიალისტური ომისთვის, რომლის საბოლოო მიზანი იქნებოდა იალტის მორიგი კონფერენცია [მოკავშირე სახელმწიფოთა მეთაურების შეხვედრა 1945 წელს], რომ დაეყო ევროპა გავლენის სფეროებად“ – განაცხადა კულებამ.
მან აღნიშნა, რომ დასავლეთს არ ჰქონდა შავი ზღვის თანმიმდევრული სტრატეგია, მაშინ როცა რუსეთს ყოველთვის ჰქონდა აგრესიული, რევანშისტული სტრატეგია.
„ყოველ ნაბიჯზე, რუსეთი იქ მოქმედებდა იქ, სადაც დასავლეთი ეჭვობდა. 2008 წელს, როცა შიშით გამოწვეული სიფრთხილემ მიხურა ნატოს კარი უკრაინისა და საქართველოსთვის, რუსეთს სწრაფად ჰქონდა რეაქცია ამაზე, ორივე ქვეყანაზე თავდასხმით.
რუსეთი მანიაკი ხდებოდა, მაგრამ ზოგიერთმა ლიდერმა გადაწყვიტა, რომ საუკეთესო სტრატეგიაა, გააბედნიერო მანიაკი, მათ შორის მისი პოტენციური მსხვერპლების დაუცველად დატოვებით“, – თქვა კულებამ.
კულებას განცხადებას დღეს, 13 აპრილს კრემლმა უპასუხა.
„შავი ზღვა არასოდეს იქნება ნატოს ზღვა, ის საერთოა მის სანაპიროზე მდებარე ყველას სახელმწიფოსთვის“ – განაცხადა რუსეთის პრეზიდენტის პრესმდივანმა დიმიტრი პესკოვმა ჟურნალისტებთან კულებას განცხადების კომენტირებისას.
შავ ზღვას სულ 6 სახელმწიფო ესაზღვრება, აქედან 3 ქვეყანა: თურქეთი, ბულგარეთი და რუმინეთი ნატოს წევრი ქვეყნებია, საქართველოსა და უკრაინას კი სურთ ნატოში გაწევრიანება და თუ ეს მოხდება, შავ ზღვაზე მხოლოდ ერთი ქვეყანა, რუსეთი დარჩება ნატოს მიღმა.
