დღეს, 22 მარტს, საქართველოს პარლამენტში მიმდინარე პლენარულ სხდომაზე საქართველოს თავდაცვის მინისტრის მოადგილემ, გრიგოლ გიორგაძემ, „თავდაცვის კოდექსის“ პროექტი წარადგინა.
ახალი კოდექსის პროექტის თანახმად, ცვლილება უნდა შევიდეს კანონში „საქართველოს მოქალაქეების საქართველოდან გასვლისა და საქართველოში შემოსვლის წესების შესახებ“.
ცვლილების თანახმად, საქართველოდან დროებით გასული საქართველოს მოქალაქეები, რომლებიც კანონის შესაბამისად ექვემდებარებიან წვევამდელთა ეროვნული სამხედრო სამსახურის გავლას, გაწვევის შესახებ შეტყობინების მიღებისთანავე ვალდებულნი არიან დაუყოვნებლივ ჩამოვიდნენ საქართველოში წვევამდელთა ეროვნული სამხედრო სამსახურის გასავლელად.
ამ მუხლთან და მის აღსრულებასთან დაკავშირებით პლენალურ სხდომაზე ბევრი შეკითხვა დაისვა.
„ანუ, რომ მიიღებს გაწვევას ადამიანი, მიღებისთანავე ვალდებულნი არიან დაუყოვნებლივ ჩამოვიდნენ საქართველოში სამხედრო სამსახურის გასავლელად.
შინაარსობრივად ეს როგორ შეიძლება ხდებოდეს? მე მაინტერესებს, მაგალითად, გერმანიაში რომაა ჩვენი მოქალაქე, როგორ უნდა ჩამოვიდეს? თქვენ გინდათ, რომ სამუდამო ემიგრაციაში დატოვოთ ხალხი? რომ არავინ ჩამოვიდეს? თუ გგონიათ, რომ ერთი თვით რომ ჩამოიყვან, საზღვარზე დააყენებ, ხალხს გაუხარდება და დაბრუნდება ვინც მიგრანტი იყო? ან აღსრულებას როგორ გააკეთებთ, ტექნიკურად როგორ გააკეთებთ ამას, ბილეთს უყიდით თვითმფრინავის? მის სამსახურს დააზღვევთ, რომელიც იქ ჰქონდა? რატომ დაგჭირდათ ეს ჩანაწერი, რომ ადამიანი დაუყოვნებლივ უნდა ჩამოვიდეს და აგერ კარისკაცად იმუშაოს, მაგალითად პარლამენტთან. რა არის ამის მიზეზი?“ – ჰკითხა „გირჩელმა“ ალექსანდრე რექვიაშვილმა თავდაცვის მინისტრის მოადგილეს.
იგივე კითხვა ჰქონდათ საპარლამენტო ოპოზიციის სხვა წევრებსაც. დაისვა კითხვები: როგორ მიიღებს უცხოეთში მყოფი საქართველოს მოქალაქე შეტყობინებას გაწვევის შესახებ? რა სანქცია ემუქრება მას გამოუცხადებლობის შემთხვევაში? გადაეცემა თუ არა საქმე პროკურატურას?
ამ კითხვების პასუხად თავდაცვის მინისტრის მოადგილემ, გრიგოლ გიორგაძემ განაცხადა, რომ ამ შემთხვევაში კოდექსი მოქმედი კანონმდებლობის თანახმად იმუშავებს:
„მოქმედი კანონმდებლობით, თუ პირი იმყოფება საზღვარგარეთ, ის ვალდებულია დადგეს აღრიცხვაზე საკონსულოში და თუ ის სამხედრო ვალდებულია, მან ეს ვალდებულება უნდა შეასრულოს.
რაც შეეხება პასუხისმგებლობას, პირველ ეტაპზე ეს არის ჯარიმა, ხოლო შემდეგ, თუ თავის არიდებასთან გვაქვს საქმე, ეს არის სისხლის სამართლის საქმე. ეს არის ნორმა“ – განაცხადა გიორგაძემ.
კითხვაზე, როგორ გეგმავს სამინისტრო ამ მუხლის აღსრულებას, გრიგოლ გიორგაძემ განაცხადა, რომ აღსრულებას სამინისტრო არ ახორციელებს, ეს სხვა უწყებების კომპეტენციაა და, შესაბამისად, ეს კითხვა სხვა უწყებებს მიემართება.
- რა იცვლება?
სავალდებულო სამხედრო სამსახურს ეცვლება სახელი და ეწოდება „წვევამდელთა ეროვნული სამხედრო სამსახური“. სიახლე ითვალისწინებს სავალდებულო სამსახურის 12-თვიანი ვადის შემცირებას, ასევე, წვევამდელების მიერ მხოლოდ საქართველოს თავდაცვის სამინისტროს სისტემაში საბრძოლო მომზადების გავლას.
კერძოდ, ცვლილებების შემდეგ 12-თვიანი ვადის ნაცვლად სამსახურის დიფერენცირებული ვადები შემდეგნაიარად განისაზღვრება:
- საბრძოლო ქვედანაყოფში სამსახურისათვის – 6 თვე
- დაცვის ან უზრუნველყოფის ქვედანაყოფში სამსახურისათვის – 8 თვე
- უმცროს სამეთაურო თანამდებობებზე და წინასწარ განსაზღვრულ სპეციალობებზე სამსახურისათვის – 11 თვე
______________
ფოტო: საქართველოს თავდაცვის სამინისტრო
