აშშ-ის ეროვნული უშიშროების საბჭოს სტრატეგიული კომუნიკაციების კოორდინატორმა ჯონ კირბიმ განაცხადა, რომ მომავალი კვირები უკრაინის ომში „კრიტიკული“ იქნება. მისივე თქმით, შესაძლებელია შეტევები რამდენიმე მიმართულებით განხორციელდეს.
CNN-ი კირბის განცხადებას ციტირებს, რომლის მიხედვითაც, შეერთებულ შტატებს სჯერა, რომ რუსეთის პრეზიდენტი ვლადიმერ პუტინი, „მორიგი შეტევის დაწყებას შეეცდება“ და, შესაძლოა, რამდენიმე მიმართულებით.
CNN-ის რეპორტიორის კითხვას, ძალიან ბევრ დროს ხომ არ უთმობს კიევი ბახმუტისთვის ბრძოლას, კირბიმ უპასუხა, რომ უკრაინელები ქვეყნის აღმოსავლეთში ისევ „მამაცურად იბრძვიან“ ქალაქისთვის.
„უკვე 21 მარტია, რუსებმა კი ბახმუტი ჯერ კიდევ ვერ მიიტაცეს“, – თქვა კირბიმ.
ამერიკის შეერთებული შტატების უშიშროების საბჭოს წარმომადგენელმა ხაზგასმით აღნიშნა, რომ შტატები გააგრძელებს უკრაინის უზრუნველყოფას „ყველაფრით, რაც საჭიროა“.
„ჩვენ უნდა დავრწმუნდეთ, რომ ყველაფერს ვაკეთებთ, რათა უკრაინა მზად იყოს ამისთვის [რუსეთის ფედერაციის შესაძლო შეტევისთვის – UNIAN]“, – განაცხადა მან.
კირბის თქმით, აშშ-ს სურს, რომ უკრაინელებმა შეძლონ დაიცვან თავი რუსეთის ნებისმიერი შეტევისგან და ასევე ჰქონდეთ შესაძლებლობა „განახორციელონ საკუთარი შეტევითი ოპერაციები ნებისმიერ დროს, ნებისმიერ ადგილას და ნებისმიერი მასშტაბით“.
_____
2022 წლის დასასრულს რუსეთი შესაძლო ახალი შეტევას ბევრი ექსპერტი ვარაუდობდა. უკრაინული მედიის თქმით, ეს მართლაც მოხდა, თუმცა, მხოლოდ დონბასში, სადაც რუსეთის ფედერაცია წარუმატებლად ცდილობს ბახმუტის ხელში ჩაგდებას – ამ ქალაქის გარშემო სასტიკი ბრძოლები მიმდინარეობს.
უკრაინული მედიის ცნობით, აზოვის პოლკის ყოფილი მეთაური, მაქსიმ ჟორინი მიიჩნევს, რომ რუსეთის ფედერაცია მეორე დიდ შეტევას განახორციელებს უკრაინის წინააღმდეგ. ის შეტევის კონკრეტულ მიმართულებებსაც ასახელებს.
უკრაინის დაზვერვა დარწმუნებულია, რომ კრემლს ახალი მასიური შეტევის რესურსი არ აქვს.
