აშშ-ის ყოფილმა პრეზიდენტმა, დონალდ ტრამპმა დღეს, 18 მარტს, განაცხადა, რომ მას მომავალ კვირაში, სამშაბათს დააპატიმრებენ, რადგან პროკურორები განიხილავენ ბრალდებებს პორნოვარსკვლავისთვის ფულის გადახდის გამო – წერს „ბიბისი“.
მისი მოსალოდნელი დაკავების შესახებ დონალდ ტრამპმა სოციალურ ქსელში – Truth Social-ში დაწერა და მხარდამჭერებს პროტესტისკენ მოუწოდა.
„ბიბისის“ ცნობით, ტრამპის ერთ-ერთმა ადვოკატმა განმარტა, რომ ტრამპის განცხადება ეფუძნება მედიის მიერ გავრცელებულ ინფორმაციას იმის შესახებ, რომ მას შეიძლება მომავალ კვირას წაუყენონ ბრალი.
თუ ეს ასე მოხდება, ეს იქნება პირველი სისხლის სამართლის საქმე აშშ-ის ყოფილი პრეზიდენტის წინააღმდეგ.
„ბიბისი“ წერს, რომ ხუთი წლის განმავლობაში ნიუ იორკში პროკურორები იძიებდნენ ბრალდებებს იმის შესახებ, რომ ტრამპის სახელით ყოფილ პორნოვარსკვლავ სტორმი დენიელსს 2016 წლის საპრეზიდენტო არჩევნების წინ ფული გადაუხადეს დუმილის სანაცვლოდ.
კერძოდ, სტორმი დენიელსი ამბობს, რომ მას ტრამპის ყოფილმა ადვოკატმა, მაიკლ კოენმა 2016 წლის არჩევნებამდე გადაუხადა 130,000 დოლარი, სავარაუდო რომანის შესახებ დუმილის ნაცვლად.
ტრამპი უარყოფს, რომ სექსუალური კავშირი ჰქონდა დენიელსთან და საქმეს პოლიტიკურად მოტივირებულს უწოდებს.
„ბიბისი“ წერს, რომ ნიუ იორკის რაიონულ პროკურატურაში კომენტარი ამ თემაზე ჯერ არ გაუკეთებიათ. ტრამპის ადვოკატმა, სიუზან ნეჩელესმა კი BBC-ის ამერიკულ პარტნიორ CBS News-ს განუცხადა, რომ ტრამპის განცხადება მედიის ცნობებს ეფუძნებოდა.
„ბიბისი“ ასევე წერს, რომ ამერიკული მედიაორგანიზაციების ცნობით, ნიუ იორკში სამართალდამცავი უწყებები ემზადებიან იმისთვის, რომ ტრამპს ბრალი წაუყენონ და ამის შესახებ მანჰეტენის სასამართლო დარბაზში გამოცხადდეს მომავალ კვირას.
