„ვერავინ დადგება კანონზე მაღლა“ – გერმანიის კანცლერი პუტინის დაკავების ორდერზე

გერმანიის ფედერალურმა კანცლერმა, ოლაფ შოლცმა განაცხადა, რომ  მიესალმება რუსეთის პრეზიდენტის ვლადიმერ პუტინზე სამართლის საერთაშორისო სასამართლოს მიერ გამოცემულ დაკავების ორდერს.

„კანონზე და კანონზე მაღლა ვერავინ დადგება“, – განაცხადა შოლცმა დღეს, 18 მარტს, ტოკიოში ვიზიტის დროს, „ეს არის საერთაშორისო სამართლის ძალიან მნიშვნელოვანი პრინციპი“ – დასძინა მან.

ჰააგის სისხლის სამართლის საერთაშორისო სასამართლომ ვლადიმერ პუტინის დაკავებაზე ორდერი გუშინ, 17 მარტს გამოსცა.

პუტინთან ერთად ორდერი გამოიცა მარია ლვოვა-ბელოვას დაკავებაზეც. ამ უკანასკნელს რუსეთის პრეზიდენტის ადმინისტრაციაში ბავშვთა უფლებების კომისრის თანამდებობა უკავია.

პუტინსა და ლვოვა-ბელოვას ბრალი წაუყენეს ბავშვების უკანონო დეპორტაციისთვის უკრაინის ოკუპირებული ტერიტორიებიდან რუსეთში, რაც ომის დანაშაულად მიიჩნევა.

„არსებობს საფუძვლიანი გარემოება, რათა ვიფიქროთ, რომ ბატონი პუტინი პირადადაა პასუხისმგებელი ზემოხსენებულ დანაშაულში“, – ნათქვამია ჰააგის სასამართლოს განცხადებაში.

მას შემდეგ, რაც რუსეთმა უკრაინაში ომი დაიწყო, უკრაინული მხარე იუწყებოდა, რომ ოკუპირებული ტერიტორიებიდან, და არამხოლოდ, ბავშვები უკანონოდ რუსეთში გადაჰყავდათ.

უკრაინული მხარის ინფორმაციით, საუბარია სულ მცირე 16 ათას ბავშვზე.