მთავარი,მთიანი აჭარა,სიახლეები

ბათუმში ჭიშკრების შეცვლაზე მერიის სამმართველომ ტენდერი შეწყვიტა და ხელახლა გამოაცხადა

20.03.2023 • 3270
ბათუმში ჭიშკრების შეცვლაზე მერიის სამმართველომ ტენდერი შეწყვიტა და ხელახლა გამოაცხადა

ბათუმში საცხოვრებელი სახლების ეზოს შესასვლელი ჭიშკრების მოწყობაზე გამოცხადებული ტენდერი მერიის ინფრასტრუქტურისა და კეთილმოწყობის სამმართველომ შეწყვიტა და ხელახლა გამოაცხადა. შესყიდვის სავარაუდო თანხა უცვლელია – 132 ათას 910 ლარი.

ტენდერის შეწყვეტის მიზეზი, როგორც დოკუმენტებიდან ირკვევა, ერთ-ერთი მონაწილე შპს „იმპექსის“ საჩივარი გახდა, რომლითაც ის სატენდერო კომისიის გადაწყვეტილებას დავების საბჭოში ასაჩივრებდა. კომისიამ ამ კომპანიას ტენდერში დისკვალიფიკაცია მისცა – ტექნიკური დოკუმენტაციის გამო.

შესყიდვების სააგენტოს დავების საბჭოს გადაწყვეტილების შემდეგ, მერიის სამმართველოს სატენდერო კომისიამ მიიჩნია, რომ ხარვეზი მათ მიერ მომზადებულ სატენდერო პირობებში იყო და ამ პირობების დაზუსტების მიზნით, ტენდერი საერთოდ შეწყვიტა:

ამონარიდი ტენდერის შეწყვეტის შესახებ მერიის სამმართველოს სატენდერო კომისიის ოქმიდან

ტენდერში ოთხი კომპანია მონაწილეობდა: „მედიატორი“, რომელიც სამმართველოს მომსახურებას 127 999 ლარად სთავაზობდა; „იმპექსი“ – 126 126 ლარი; „მშენებელთა ჯგუფი“ – 122 221 ლარი და „ინტერიერი“ – 99 784 ლარი.

მათგან სამს სატენდერო კომისიამ დისკვალიფიკაცია მისცა, ხოლო „მედიატორი“, რომელიც ყველაზე ძვირად სთავაზობდა მომსახურებას, სამმართველომ ხელშეკრულების გასაფორმებლად 2023 წლის 27 იანვარს მიიწვია, 21 თებერვალს კი, ტენდერი შეწყვიტა.

ხელახალ ტენდერში წინადადებების მიღება 2023 წლის 29 მარტს დაიწყება და 31 მარტს დასრულდება.

სამუშაოს შესრულების ვადა სამმართველოს არ შეუცვლია და ის ხელშეკრულების დადებიდან 2023 წლის 30 აგვისტოს ჩათვლით არის განსაზღვრული.

რაც შეეხება სატენდერო მოთხოვნას, რომელიც მერიის სამმართველომ შეცვალა, შეწყვეტილ ტენდერში შესაბამისი პუნქტი ჩამოყალიბებული იყო შემდეგნაირად:

„ტენდერში მონაწილე პრეტენდენტს შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულისა და შინაარსის (მეტალის ჭიშკარი, მეტალის კარი, რკინის კონსტრუქციების შედუღების სამუშაოები დამზადება-მონტაჟი) სამუშაოები საერთო ღირებულებით არანაკლებ 70 000 (სამოცდაათი ათასი) ლარის ოდენობით“.

ხელახლა გამოცხადებულ ტენდერში კი, იგივე პუნქტი ასეა შეცვლილი:

„ტენდერში მონაწილე პრეტენდენტს შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულისა და შინაარსის (მეტალის ჭიშკარი, მეტალის კარი, რკინის კონსტრუქციების (სადაც იკვეთება შედუღება) დამზადება-მონტაჟის სამუშაოები) სამუშაოები საერთო ღირებულებით არანაკლებ 500 000 (ხუთასი ათასი) ლარის ოდენობით;
ასევე 2020 წლის 1-ელი იანვრიდან ტენდრის გამოცხადების დღემდე შესრულებული უნდა ჰქონდეს ტენდერით გათვალისწინებული ანალოგიური ხასიათის, სირთულისა და შინაარსის (მეტალის ჭიშკარი, მეტალის კარი, რკინის კონსტრუქციების (სადაც იკვეთება შედუღება) დამზადება-მონტაჟის სამუშაოები) სამუშაოები უშუალოდ ერთი ხელშეკრულების ფარგლებში 100 000 (ასი ათასი) ლარის ოდენობით.“

აღნიშნული ტენდერის ფარგლებში, თუ სად აპირებს ბათუმის მერია ჭიშკრების შეცვლას, მისამართები ნახეთ ამ ბმულზე:

ეზოს მისამართები ბათუმში, სადაც მერია ჭიშკრებს მოაწყობს

გადაბეჭდვის წესი


ასევე: