მთავარი,სიახლეები

ახალი მოსამართლე ბათუმში, რომელსაც მხოლოდ ოთხწლიანი იურიდიული განათლება აქვს

16.03.2023 • 8950
ახალი მოსამართლე ბათუმში, რომელსაც მხოლოდ ოთხწლიანი იურიდიული განათლება აქვს

ბათუმის საქალაქო სასამართლოში ახალი მოსამართლე გაამწესეს – გიორგი ლობჟანიძე მაგისტრი მოსამართლე იქნება ქობულეთში.

გიორგი ლობჟანიძე პროფესიით იურისტია და ეკონომისტიც. ის მხოლოდ ოთხწლიანი უმაღლესი განათლებით გახდა მოსამართლე. გიორგი ლობჟანიძის სხვა უმაღლესი განათლების შესახებ ინფორმაცია ბათუმის საქალაქო სასამართლოს ან იუსტიციის უმაღლეს საბჭოს გამოქვეყნებული არ აქვს ბიოგრაფიაში, რაც ოფიციალურ საიტებზეა ხელმისაწვდომი.

გიორგი ლობჟანიძეს 1996 წელს აქვს დამთავრებული პროფესორ ჯ. ბაქრაძის სახელობის თბილისის სამართლისა და ეკონომიკის ინსტიტუტის სამართალმცოდნეობის და ეკონომიკის ფაკულტეტი. ეს ის უმაღლესი სასწავლებელია, რომელიც მირანდა ერემაძესაც აქვს დამთავრებული 1995 წელს. ეს ამბავი 2019 წელს სახალხო დამცველის სპეციალური მოკვლევის, ასევე კრიტიკის საგანი გახდა.

2019 წელს პარლამენტი უზენაესი სასამართლოს მოსამართლეებს არჩევდა, მათ შორის იყვნენ ყოფილი გენპროკურორი შალვა თადუმაძე [რომლის დიპლომი და კვალიფიკაცია ასევე იყო კრიტიკის საგანი, მას ჰუმანიტარული ინსტიტუტი აქვს დამთავრებული] და მირანდა ერემაძე. ეს ადამიანები დღეს უზენაესი სასამართლოს მოსამართლეები არიან.

ბათუმის საქალაქო სასამართლოს ინფორმაციით, ბათუმში მუშაობის დაწყებამდე, ბოლო ორი წლის განმავლობაში, გიორგი ლობჟანიძე ახალციხის რაიონული სასამართლოს მაგისტრატი მოსამართლე იყო ასპინძაში, მანამდე კი, მცხეთის რაიონული სასამართლოს მოსამართლე იყო 2007 – 2017 წლებში.

გიორგი ლობჟანიძის, როგორც მოსამართლის კარიერა ჯავაში იწყება. აქ მუშაობდა თავდაპირველად იგი მოსამართლედ 2006- 2007  წლებში. მოსამართლეს ადვოკატად მუშაობის გამოცდილება აქვს.

გადაბეჭდვის წესი


ასევე: