“საქართველოს რკინიგზამ” დამატებითი რეისები დანიშნა „Maroon 5“-ის კონცერტთან დაკავშირებით. ცნობილი ამერიკული ბენდის კონცერტი ბათუმში, ანბანის კოშკთან, 7 ივნისს გაიმართება. მატარებლები დამატებითი რეისს შეასრულებენ 6, 7 და 8 ივნისს.
თბილისიდან ბათუმის მიმართულებით ორი მატარებელი გამოვა 07:20, ასევე 10:25 საათზე.
ბათუმიდან თბილისის მიმართულებით კი მატარებელი გავა 14:00 და 16:35 საათზე.
„ეს ცვლილება ფასზე არ ასახულა და ბილეთების თითქმის 95 პროცენტი გაყიდულია. დარჩენილია ბილეთები, ძირითადად 8 ივნისის რეისზე, ბათუმიდან თბილისის მიმართულებით. კიდევ დამატების საჭიროება გამოჩნდა, მაგრამ მეტი რესურსი რკინიგზას არ აქვს” – უთხრა “ბათუმელებს” დაჩი ცაგურიამ, “საქართველოს რკინიგზის” პრესსამსახურის უფროსმა.
„Maroon 5“-ის კონცერტი ბათუმში საქართველოს მთავრობის მიერ შექმნილი პროექტის „Check in Georgia“ ფარგლებში ტარდება. პროექტი მასშტაბური კულტურული ღონისძიებების სერიას მოიცავს, რომელიც თბილისსა და ქვეყნის რეგიონებში გაიმართება. ორგანიზატორთა განცხადებით, ღონისძიება ტრადიციულ ხასიათს მიიღებს.