მონაწილეები ბათუმში 14:00 საათიდან, საქალაქო სასამართლოსთან (ზუბალაშვილის #30) შეიკრიბებიან და 15:00 საათზე მარშით წავლენ ევროპის მოედნისკენ.
„მოგმართავთ 8 მარტს, ქალთა უფლებების საერთაშორისო დღეს, საქართველოში მცხოვრებ ყველა ქალს – სოფლად და ქალაქად მცხოვრებ ქალებს; შინ და გარეთ მშრომელ ქალებს, შეზღუდული შესაძლებლობის მქონე (შშმ) ქალებსა და შშმ ბავშვების დედებს, ყველა ეროვნებისა და რელიგიური მრწამსის ქალებს; ქვიარ და ტრანს ადამიანებს; მიგრანტ, ლტოლვილ და იძულებით გადაადგილებულ ქალებს, მარტოხელა დედებს, ყველა ასაკისა და პროფესიის ქალსა და გოგოს, ყველას, ვინც თავს ქალად მოიაზრებს.
თუ შენი თავი ამოიცანი, ჩვენი მიმართვა შენ გეხება!” – ეს მოკლე ამონარიდია იმ მანიფესტიდან, რომელსაც 8 მარტს ქალები ყველა ქალაქში წაიკითხავენ.
„გამოვედით, რომ ხმამაღლა ვთქვათ – ჩვენი უფლებებისთვის ხანგრძლივი ბრძოლის გაუფასურებას და მოპოვებული უფლებების წართმევას ჩვენ არ დავუშვებთ!
ქალებო, გავერთიანდეთ ტოტალური კონტროლის წინააღმდეგ, რადგან თითოეული ჩვენგანის ხმა ჩვენს თავისუფლებასა და ქვეყნის დამოუკიდებლობას განსაზღვრავს! ქალები არ შევეგუებით ჩაგვრას, უსამართლობასა და უთანასწორობას! ქალები არ დავთმობთ საქართველოს დამოუკიდებლობას!“ – ვკითხულობთ მიმართვაში.
ბათუმის გარდა მარში გაიმართება შემდეგ ქალაქებში:
- თბილისი (რესპუბლიკის მოედნიდან მარშით პარლამენტისკენ);
- ქუთაისი (აღმაშენებლის გამზირი #1 – ლადო მესხიშვილის თეატრის წინ);
- ოზურგეთი (ჭადრების ბაღი);
- ამბროლაური (კოსტავას #28 – ახალ პარკთან);
- ბოლნისი (სულხან-საბა ორბელიანის #106 – კულტურის სახლის წინ);
- გორი (სახელმწიფო დრამატული თეატრის მიმდებარე სკვერი);
- თელავი (სახელმწიფო დრამატული თეატრის წინ);
- ახმეტა (რუსთაველის #3 – KRDF-ის ოფისის წინ);
- მარნეული (რუსთაველის ქუჩა #73 – მარნეულის მერიის წინ)
ამავე თემაზე:
8 მარტს ქალები რუსული კანონის წინააღმდეგ გამოვლენ – აქცია 13 ქალაქში
