გაერთიანებული სამეფოს 27 თებერვლის ანგარიში უკრაინის ქალაქ მარიუპოლში არსებულ მდგომარეობას მიმოიხილავს. როგორც ანგარიშში ვკითხულობთ, 2023 წლის 21 თებერვლის შემდეგ, პრორუსმა ჩინოვნიკებმა რუსეთის მიერ ოკუპირებული მარიუპოლის ირგვლივ მინიმუმ 14 აფეთქების შესახებ განაცხადეს.
უწყების ცნობით, აფეთქების ადგილებში შედის იარაღის საწყობი აეროპორტში, ორი საწვავის საცავი და ერთი ფოლადის საწარმო, რომლებსაც რუსეთი სამხედრო ბაზად იყენებს. დაზვერვის ექსპერტები აღნიშნავენ, რომ მარიუპოლი ფრონტის ხაზიდან, მინიმუ 80 კილომეტრითაა დაშორებული.
ბრიტანეთის დაზვერვის შეფასებით, რუსეთი, სავარაუდოდ, შეშფოთებული იქნება, რომ აუხსნელი აფეთქებები ხდება იმ ზონაში, რომელიც მანამდე შეაფასა, როგორც „უკრაინის რუტინული თავდასხმების შესაძლებლობის ფარგლებს გარეთ მყოფი“.
„მიუხედავად იმისა, რომ ომის ადრეულ ეტაპზე მარიუპოლის დიდი ნაწილი განადგურდა, რუსეთისთვის ის კვლავაც მნიშვნელოვან ქალაქდ რჩება, რადგან ის არის უდიდესი ქალაქი, რომელიც რუსეთმა დაიპყრო 2022 წელს, რომელსაც ჯერ კიდევ აკონტროლებს და რომელიც მთავარ ლოჯისტიკურ მარშრუტზე მდებარეობს“, – ვკითხულობთ გაერთიანებული სამეფოს დაზვერვის 27 თებერვლის ანგარიშში.
