ხელვაჩაურის იმ სოფლების მოსახლეობას, რომლებმაც გუშინ, 28 მაისს, მდინარე ჭოროხზე ჰესების მშენებელი კომპანიის წინააღმდეგ საპროტესტო აქცია გამართეს, საქართველოს ენერგეტიკის მინისტრის მოადგილე ილია ელოშვილი შეხვდა. რეზო დიასამიძის თქმით, რომელიც შეხვედრას ესწრებოდა მინისტრის მოადგილე მათ საკითხის გარკვევას ერთ კვირაში შეჰპირდა. შეხვედრას ხელვაჩაურის მუნიციპალიტეტის გამგებელი ნადიმ ვარშანიძეც ესწრებოდა.
მოსახლეობა იმ ნაკვეთებისთვის, რომლებსაც ჰესების მშენებლობის დაწყებამდე ამუშავებდა, ხოლო მშენებლობის დაწყების შემდეგ მათთვის უსარგებლო გახდა, კომპენსირებას ითხოვს.
მდინარე ჭოროხზე თურქული კომპანია „აჭარ ენერჯი 2007“ ორ, კალაპოტური ტიპის ჰესს აშენებს. პროექტის გარემოზე ზემოქმედების შეფასების დოკუმენტის მიხედვით, რაზე დაყრდნობითაც საქართველოს გარემოს დაცვის სამინისტრომ მდინარე ჭოროხზე სამი, კალაპოტური ტიპის კაშხლის მშენებლობის ნებართვა გასცა, წყლით დაიფარება ექვსი სოფლის მოსახლეობის სასოფლო-სამეურნეო სავარგულები და ხელვაჩაურის მუნიციპალიტეტის საკუთრებაში არსებული საძოვრების ნაწილი. მთლიანობაში კი პროექტის ზემოქმედების ქვეშ მუნიციპალიტეტის ტერიტორიის 2, 25 კვ/კმ მოექცევა.
ამავე თემაზე: ჰესების მშენებელი კომპანია “აჭარ ენერჯი 2007” დაზარალებულებს შეპირებულ კომპენსაციას არ უხდის
