გაერთიანებული სამეფოს დაზვერვა 23 თებერვლის ანგარიშში ბრძოლის ველზე მდგომარეობას მიმოიხილავს. როგორც ანგარიშში ვკითხულობთ, ბოლო 48 საათის განმავლობაში გრძელდება მძიმე ბრძოლა ბახმუტის სექტორში. უწყების ცნობით, ამ სექტორში, მიუხედავად რუსების ექვსკვირიანი ალყაში მოქცევის აქტიური მცდელობისა, უკრაინელები კვლავაც ღიად ინარჩუნებენ მომარაგების მარშრუტებს დასავლეთისკენ.
გარდა ამისა, ბრიტანეთის დაზვერვა იუწყება, რომ სამხრეთ დონეცკის ოლქში მდებარე ქალაქი ვუჰლედარი კვლავაც მძიმე დაბომბვის ქვეშაა. დაზვერვის შეფასებით, არსებობს რეალური შესაძლებლობა, რომ რუსეთი ამ არეალში კიდევ ერთი შეტევისთვის ემზადება, მიუხედავად 2022 წლის ბოლოსა და 2023 წლის თებერვლის დასაწყისში განცდილი მძიმე წარუმატებლობისა.
ბრიტანელი სპეციალისტები ასევე ვარაუდობენ, რომ ვუჰლედარის ოპერაციაზე პასუხისმგებელი რუსეთის აღმოსავლეთის სამხედრო ჯგუფია. მისი მეთაური, გენერალ-პოლკოვნიკი რუსტამ მურადოვი, სავარაუდოდ, ინტენსიური ზეწოლის ქვეშაა, რათა გააუმჯობესოს შედეგები წინა წარუმატებლობის გამო რუსული ნაციონალისტური საზოგადოების მკაცრი კრიტიკის შემდეგ.
„თუმცა ნაკლებად სავარაუდოა, რომ მურადოვს გარღვევის მისაღწევად საჭირო შემტევი ძალა ჰქონდეს” – ვკითხულობთ გაერთიანებული სამეფოს დაზვერვის 23 თებერვლის ანგარიშში.
