გაერთიანებული სამეფოს დაზვერვის 18 თებერვლის ანგარიში რუსეთში სამხედრო მობილიზაციის დამატებითი ტალღის შესაძლებლობას მიმოიხილავს.
როგორც უწყება აღნიშნავს, ანდრეი ტურჩაკმა, რუსეთის საპარლამენტო ჯგუფის ლიდერმა, რომელიც ორიენტირებულია უკრაინაში ე.წ. „სპეციალურ სამხედრო ოპერაციაზე“, 2023 წლის 16 თებერვალს განაცხადა, რომ ჯგუფმა ანგარიში წარუდგინა რუსეთის პრეზიდენტს, ვლადიმერ პუტინს.
ბრიტანეთის დაზვერვა ვარაუდობს, რომ ანგარიში მოიცავს ისეთ საკითხებს, როგორიცაა მობილიზებულთა და მათი ოჯახების სოციალური მხარდაჭერა. ეს საკითხები, ბრიტანელი ანალიტიკოსების შეფასებით, უფრო აქტუალური გახდება, თუ შემდგომი მობილიზაცია (იქნება ეს აშკარა თუ ფარული) გამოცხადდება.
გაერთიანებული სამეფოს დაზვერვის სამსახური აღნიშნავს, რომ პუტინმა, შესაძლოა, 2023 წლის 21 თებერვალს თავის მიმართვაში ამ საკითხებზე ისაუბროს.
უწყების ანგარიშში ასევე აღნიშნულია, რომ კრემლისთვის სულ უფრო რთული ხდება მოსახლეობის იზოლირება უკრაინის ომისგან.
ამის დასტურად, ანგარიშში 2022 წლის დეკემბერში რუსეთში ჩატარებული გამოკითხვაა მოყვანილი არგუმენტად, რომლის თანახმადაც, 52%-ს ჰყავდა მეგობარი ან ნათესავი, რომელიც ე.წ. „სპეციალურ სამხედრო ოპერაციაში“ მონაწილეობდა უკრაინაში.
_______________
ფოტო: EPA-EFE/MAXIM SHIPENKOV
