თურქეთში, ჰატაის პროვინციაში, დამანგრეველი მიწისძვრიდან მე-11 დღეს სახლის ნანგრევებიდან მაშველებმა 14 წლის ბიჭი ცოცხალი გამოიყვანეს.
ერზრუმელმა მაშველებმა, რომლებიც დანგრეულ შენობასთან მუშაობდნენ, სააგენტო „ანადოლუს“ უთხრეს, რომ ადგილზე უკვე მძიმე ტექნიკით მუშაობდნენ, მაგრამ ყურს უგდებდნენ ყველა ხმას ნანგრევებიდან. სწორედ ამ დროს გაიგონეს მათ ბიჭის ხმა.
„ნანგრევებში გავთხარეთ გვირაბი და შევძვერით. ბავშვს ჯერ სუნთქვის საშუალება მივეცით, შემდეგ კი გამოვიყვანეთ“ – უამბო ჟურნალისტებს ენგინ ბაირაკმა, ერზერუმის სამაშველო სამსახურიდან.
მაშველები ამბობენ, რომ ბავშვი მოსახერხებელ მდგომარეობაში იპოვეს და მას შესამჩნევი დაზიანებები არ აღენიშნებოდა. 14 წლის ბიჭი ამჟამად კლინიკაშია გადაყვანილი.
მიუხედავად იმისა, რომ თურქეთში დამანგრეველი მიწისძვრიდან 12 დღე გავიდა, მაშველებს ჯერ ისევ გამოჰყავთ ნანგრევებიდან ცოცხალი ადამიანები.
6 თებერვალს 7,7 და 7,6 მაგნიტუდის მიწისძვრებმა, რომელთა ეპიცენტრიც იყო კაჰრამანმარას პროვინციაში, უდიდესი ნგრევა და მსხვერპლი გამოიწვია. ბოლო ცნობებით, დაიღუპა მინიმუმ 36 187 ადამიანი.
თურქეთის კატასტროფებისა და საგანგებო სიტუაციების მართვის სამსახური აცხადებს, რომ დღეის მდგომარეობით ადგილზე 253 000-ზე მეტი მაშველი მუშაობს.
მიწისძვრის შედეგად დაზარალებული რეგიონებიდან ამ დროისთვის სულ მცირე 216 347 ადამიანის ევაკუაცია განხორციელდა.
________________
ფოტო: „ანადოლუ“/aa.com.tr
