მთავარი,სიახლეები

ქუთაისში გამსახურდიას ქუჩის შესაკეთებლად 4,7 მილიონი ლარი დაიხარჯება

30.01.2023 • 1125
ქუთაისში გამსახურდიას ქუჩის შესაკეთებლად 4,7 მილიონი ლარი დაიხარჯება

ქუთაისში, ზვიად გამსახურდიას გამზირის რეაბილიტაციისათვის 4 მილიონ 752 782 ლარი დაიხარჯება.

ქუთაისის მერიამ იმ კომპანიის შესარჩევად, რომელიც გამსახურდიას გამზირზე საგზაო ინფრასტრუქტურის გასაახლებლად სამუშაოებს ჩაატარებს, ტენდერი ხელახლა გამოაცხადა.

[პირველი ტენდერი, ზუსტად იგივე თანხით, მერიამ 2022 წლის 30 დეკემბერს გამოაცხადა, თუმცა, არ შედგა – მასში მონაწილეობა არავინ მიიღო].

პირობის მიხედვით, ტენდერში გამარჯვებულმა კომპანიამ სამუშაოები ქუჩის ერთკილომეტრიან მონაკვეთზე უნდა აწარმოოს – რუსთაველის გამზირიდან ჭავჭავაძის გამზირამდე.

პროექტის თანახმად, ზვიად გამსახურდიას გამზირზე უნდა შეიცვალოს ბეტონის საფარი, შეიღებოს არსებული გარე განათების ბოძები, ხოლო ტროტუარის განათებისათვის დაემატოს ლამპიონები, გაიმართოს სანიაღვრე ქსელი.

„გათვალისწინებულია 24 სანიაღვრე ქსელის სათვალთვალო და 51 ცხაურიანი ჭების მოწყობა. სათვალთვალო ჭების ხუფებზე უნდა იყოს წარწერა „ქუთაისის მუნიციპალიტეტი,“ – ვკითხულობთ საპროექტო განაცხადში.

ტენდერში წინადადებების მიღება 8 თებერვალს დასრულდება. გამარჯვებულმა კომპანიამ სამუშაოები 7 თვეში უნდა დაასრულოს [პირველ ტენდერში ეს ვადა 4 თვე იყო].

შესრულებული სამუშაოს ხარისხს „ჯეოექსპერტი“ შეამოწმებს.

გადაბეჭდვის წესი


ასევე: