ნეტგაზეთი • RU

უკრაინელი მოხალისე, რომელმაც რუსული თვითმფრინავი ერთი გასროლით ჩამოაგდო ბახმუტთან

უკრაინა. 2023 წლის 5 იანვარი. მექანიზებული ბრიგადის მეომრები უთანასწორო ბრძოლაში იცავენ ბახმუტს რუსი დამპყრობლებისგან. საზენიტო მსროლელები ბრძოლის ველზე აკვირდებიან სიტუაციას. დილის ცხრის ნახევარზე სამეთაურო პუნქტიდან მიიღეს შეტყობინება, რომ სამი რუსული გამანადგურებელი დაფრინავდა ბახმუტის ცაზე – ორი Су-27 და Су-25.

„მოსაგერიებლად ჩვენი თვითმფრინავები ამ დროს ცაზე არ იყვნენ, ამიტომ ქვეითებს დაგვევალა გაგვენადგურებინა ყველა რუსული საჰაერო ხომალდი. მალევე შევნიშნეთ რამდენიმე თვითმფრინავი ერთად, საკმაოდ შორს იყვნენ.

ძლიერი ყინვა იყო და უმცროსი სერჟანტი ალექსეი ნოვიცკი საცავში ჩავიდა ხელების გასათბობად – როცა ისვრი, ხელები იდეალურად უნდა მუშაობდეს,“ – ამბობს მიხაილ კოსტი, ალექსეი ნოვიცკის თანამებრძოლი.

მალე გამანადგურებელ Су-25-ის პილოტმა დაშვება დაიწყო. შეტევისთვის მოემზადა. საჰაერო თავდაცვა სწრაფად მოქმედებდა, ამ დროს ბრძოლის ველზე წამებსაც კი გადამწყვეტი მნიშვნელობა აქვს. კოსტიამ ნოვიცკის დაავალა მისიის შესრულება.

მასალას ალექსეი ნოვიცკის  შესახებ მისი თანამებრძოლების მონათხრობზე დაყრდნობით აქვეყნებს უკრაინის შეიარაღებული ძალების საინფორმაციო სააგენტო Armyinform-ი.

„ნოვიცკიმ „სტინგერი“ გამომართვა, დაუმიზნა და გაისროლა. შავი კვამლი დავინახეთ. მერე საჰაერო დაზვერვამ რუსული თვითმფრინავის აფეთქება დაადასტურა, დრონმა მისი ნამსხვრევები აღმოაჩინა. გაოცებულები ვიყავით, ქვეითებს ყოველთვის არ უმართლებთ და წარმატებით ვერ უმიზნებენ საჰაერო გამანადგურებლებს.

რუსული თვითმფრინავის ჩამოგდების მომენტი ტელეფონის ვიდეოკამერამ შემთხვევით დააფიქსირა.

ნოვიცკის მთელი საძმო გამარჯვების სიხარულმა მოიცვა. ერთმა ჯარისკაცმა სადღაც სპორტული მედალი იპოვა ლურჯ-ყვითელი ლენტით და ნოვიცკი „დააჯილდოვა“. მიზანში ზუსტად მსროლელთან რამდენიმე სამახსოვრო ფოტოც გადაიღეს ჯარისკაცებმა. ეს ნოვიცკის უკანასკნელი ფოტოები აღმოჩნდა.

საჰაერო დაზვერვის მიერ ფიქსირებული სიმაღლე, საიდანაც უმცროსმა სერჟანტმა ნოვიცკიმ რუსული თვითმფრინავი ჩამოაგდო. ფოტო: უკრაინის შეიარაღებული ძალების საინფორმაციო სააგენტო Armyinform

„ველოდით, რომ მტრის თვითმფრინავები დაბრუნდებოდნენ. ჩავალაგეთ და სარეზერვო პოზიციებისკენ წავედით. ამ დროს საარტილერიო დაბომბვა დაიწყო, აფეთქების ტალღამ მომისროლა სადღაც, ავდექი, ავიღე „სტინგერი“ და თავშესაფრისკენ გავეშურე, მერე კი უმოძრაო ნოვიცკი დავინახე“ – იხსენებს მიხაილ კოსტი, ნოვიცკის თანამებრძოლი, რომელიც ახლაც მკურნალობს საავადმყოფოში.

ალექსეი ნოვიცკიმ სიცოცხლესთან შეუთავსებელი დაზიანებები მიიღო ჭურვის ნამსხვრევებისგან. თანამებრძოლებმა მიხეილს სამედიცინო დახმარება გაუწიეს და ექიმებამდე სწრაფად მიიყვანეს.

უმცროსი სერჟანტი ალექსეი ნოვიცკი სანგარში. ფოტო: უკრაინის შეიარაღებული ძალების საინფორმაციო სააგენტო Armyinform

ალექსეი ნოვიცკი ხმელნიცკის რაიონში დაიბადა და გაიზარდა, დატოვა სამი შვილი და დედა. ომამდე მშენებლობაზე მუშაობდა. უკრაინაში რუსეთის შეჭრის პირველსავე დღეებიდან მოხალისედ ჩაეწერა არმიაში. სამხედრო საქმე ძალიან სწრაფად აითვისა.

„ომის ბოლო თვეების განმავლობაში ალექსეი ნოვიცკი, ისევე როგორც ჩვენი მებრძოლების უმეტესობა, ჭეშმარიტად პროფესიონალი მეომარი გახდა: მამაცი, საიმედო და მიზანსწრაფული. მის მიერ განადგურებული რუსული თვითმფრინავი ამის დადასტურებაა“, – ამბობს ოლეგ ზელინსკი, მექანიზებული დანაყოფის ოფიცერი.

ზელინსკი დასძენს, რომ მათი დანაყოფის ბევრმა სამხედრომ გამოიჩინა სიმამაცე ომში:

„ჩვენს საერთო ანგარიშზეა დამპყრობლების უამრავი განადგურებული ტექნიკა,  – ტანკები, თოფები, ჯავშანტექნიკა, არაერთი წარმატებული ოპერაცია, ათასობით ლიკვიდირებული ოკუპანტი, თუმცა Stinger MANPADS-ის ოპერატორის, უმცროსი სერჟანტის ალექსეი ნოვიცკის ზუსტი დარტყმა ნამდვილად პროფესიონალური და გმირული იყო,  ნოვიცკიმ ბახმუტისთვის გაწირა თავი  სასტიკი ბრძოლების დროს, რთულ პირობებში.

ის „უკრაინის გმირის“ წოდებას იმსახურებს და ჩვენ ველით როდის მიიღებს ის ამ სტატუსს“.

ომში დაღუპული გარდაცვლილი მოხალისის მთელი სამხედრო დანაყოფი ახლა ნოვიცკისთვის გმირის წოდების მინიჭების ოფიციალურ ცერემონიას ელოდება.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com