ომის კვლევის ინსტიტუტის [ISW] ანალიტიკოსების ბოლო ანგარიშის თანახმად, რუსმა ოკუპანტებმა, სავარაუდოდ, ქალაქი სოლედარი აიღეს, მაგრამ ეს არ გამოიწვევს ბახმუტის ალყაში მოქცევას.
ამერიკული ანალიტიკური ცენტრის ანალიტიკოსები თვლიან, რომ რუსული ძალები აკონტროლებენ სოლედარს თუ მთლიანად არა, მის უდიდეს ნაწილს მაინც. როგორც ჩანს, რუსებმა წარმატებით გამოდევნეს უკრაინის დამცველები ქალაქის დასავლეთ გარეუბნებიდან.
ამავე დროს, ISW აღნიშნავს, რომ სოლედარის სავარაუდო მიტაცება არ გამოიწვევს ოპერატიული თვალსაზრისით მოვლენების მნიშვნელოვან განვითარებას. ამერიკელი ანალიტიკოსების შეფასებით, ეს შედეგი არც იმაზე მიუთითებს, რომ ბახმუტს სწრაფად მოაქცევენ ალყაში და ეს გარდაუვალია.
ომის ექსპერტები ყურადღებას ამახვილებენ უკრაინის შეიარაღებული ძალების გენერალური შტაბის მიერ 12 იანვარს გავრცელებულ ინფორმაციაზე, რომლის თანახმადაც მოიგერიეს რუსეთის თავდასხმები სოლის დასახლებაზე, რომელიც სოლედარის ჩრდილო-დასავლეთით, დაახლოებით ერთი კილომეტრში მდებარეობს. მაგრამ წინა დღეებისგან განსხვავებით, უკრაინელ სამხედროებს არ უთქვამთ, რომ თავად სოლედარზე განხორციელებული შეტევის მოგერიება მოახერხეს.
ყველა არსებული მტკიცებულება იმაზე მიუთითებს, რომ უკრაინული ძალები აღარ იცავენ სოლედარს ორგანიზებულად – ნათქვამია ინსტიტუტის მოხსენებაში.
ISW კვლავაც თვლის, რომ სოლედარის [14,2 კვ. კილომეტრი დასახლებული პუნქტის] აღება არ მისცემს რუსულ ძალებს იმის შესაძლებლობას, კონტროლი მოიპოვონ უკრაინისთვის კრიტიკულად მნიშვნელოვან სახმელეთო კომუნიკაციის ხაზებზე ბახმუტთან და არ შეუქმნის მათ მომგებიან პოზიციას მოკლე ვადაში მოაქციონ ქალაქი ალყაში.
„რუსულ ძალებს შეუძლიათ ბახმუტთან თავდასხმების მაღალი ტემპის შენარჩუნება, მაგრამ ეს ძალისხმევა არ გამოიწვევს მნიშვნელოვან ოპერატიულ შედეგებს, რადგან მათ დაკარგეს/გამოეფიტათ საბრძოლო ძალები“, – წერენ ომის კვლევის ამერიკელი ანალიტიკოსები.
