უკრაინის ეროვნული უსაფრთხოებისა და თავდაცვის საბჭოს მდივანი, ოლექსი დანილოვი დარწმუნებულია, რომ ვლადიმირ პუტინი როგორც კი აღარ იქნება რუსეთის პრეზიდენტი, იჩქერია გათავისუფლდება.
„როგორც კი პუტინი აღარ იქნება [პრეზიდენტი], იჩქერია გახდება თავისუფალი ქვეყანა. კადიროვთან ერთად ან კადიროვის გარეშე. დამიჯერეთ, ეს მოხდება აუცილებლად და ძალიან, ძალიან სწრაფად. რადგან ეს არის დამოუკიდებელი ქვეყანა, რომელსაც არაფერი აქვს საერთო რუსეთის ფედერაციასთან“, – განაცხადა დანილოვმა „უკრაინსკა პრავდასთან“ ინტერვიუში.
დანილოვის თქმით, კადიროვისა და მისი თანამზრახველებისთვის პუტინს რომ არ მიეცა საშუალება დაუსჯელად ეკეთებინათ ის, რასაც ისინი რუსეთის ფედერაციის ნებისმიერ ქალაქში სჩადიან, მაშინ იჩქერია დიდი ხნის წინ აჯანყდებოდა და უკვე თავისუფალიც იქნებოდა.
„მათ აქვთ ასეთი შეთანხმება – პუტინი ყველაფერს აძლევს: ფულს, პრეფერენციებს, შესაძლებლობებს, მედლებს. ყველაფერს. სამაგიეროდ, იჩქერია რჩება რუსეთის შემადგენლობაში“, – განაცხადა „უკრაინსკა პრავდასთან“ ინტერვიუში ოლექსი დანილოვმა.
უკრაინის ეროვნული უსაფრთხოებისა და თავდაცვის საბჭოს მდივნის თქმით, „სინამდვილეში, პუტინს ეშინია კადიროვის, რადგან ეს ის ადამიანია, ვისაც შეუძლია მას ბევრი თავსატეხი გაუჩინოს“.
ამავე ინტერვიუში დანილოვმა ისაუბრა რამზან კადიროვის მამაზე – ახმად კადიროვზე. მისი თქმით, ჩეჩნეთში, რამზან კადიროვის ჩათვლით ყველამ იცის, რომ მისი მამის მოკვლის ბრძანება სწორედ პუტინმა გასცა. „იმ კანონების მიხედვით, რაც ამ ერს აქვს, ამაზე პასუხის გაცემა სავალდებულოა. რატომ არ აკეთებს ამას კადიროვი, ეს ცალკე საკითხია“.
ახმად კადიროვი ჩეჩნეთის ერთ-ერთი პრეზიდენტი იყო. ის 2004 წელს მოკლეს.
ოლექსი დანილოვმა „უკრაინსკა პრავდასთან“ ვრცელ ინტერვიუში ისაუბრა ვითარებაზე, რომელშიც ახლა რუსეთის პრეზიდენტი იმყოფება. „პუტინი კუთხეში მიმწყვდეულ ვირთხას ჰგავს. მისი ცხოვრება კოშმარად იქცა“, – მიაჩნია ოლექი დანილოვს.
___
ჩეჩნეთის
