უკრაინის ომბუდსმენის დმიტრო ლუბინეცის თქმით, ოკუპირებული ხერსონის გათავისუფლების შემდეგ, ქალაქ ხერსონში აღმოაჩინეს საგანგებოდ არასრულწლოვანების წამებისთვის მოწყობილი კამერები. ზოგადად, მშვიდობიანი მოსახლეობის საწამებლად ოკუპანტებს ამ ქალაქში არაერთი კამერა ჰქონდათ მოწყობილი.
უკრაინის ომბუდსმენის, დმიტრო ლუბინეცის საგანგებო ბრიფინგზე გაკეთებული განცხადების თანახმად, გაირკვა, რომ რუსი ოკუპანტების მიერ მოწყობილ საწამებელ კამერებში ბავშვები საშინელ პირობებში იმყოფებოდნენ.
„ოკუპირებულ ტერიტორიებზე აღმოვაჩინეთ ბავშვების საწამებელი კამერებ. ბუჩას და ირპენის შემდეგ ვფიქრობდი, რომ ეს იყო ფსკერი. ბალაკლიაში ვნახე წამების 2 კამერა, სადაც ერთი ბიჭი 90 დღე ჰყავდათ, შემდეგ კი დასახვრეტად გაიყვანეს. ხერსონში იყო 10 წამების საკანი, მათგან ერთ-ერთში – გამოყოფილ კამერაში ბავშვებს ამწყვდევდნენ“, – დასძინა ომბუდსმენმა.
ომბუდსმენმა დასძინა, რომ ბავშვებს მხოლოდ ყოველ მეორე დღეს აძლევდნენ წყალს, არ კვებავდნენ და ეუბნებოდნენ, რომ ისინი მშობლებმა მიატოვეს.
„დააკავეს ბიჭი, რომელმაც ტელეფონით რუსული ტექნიკა გადაიღო, ის გამოკეტეს საკანში და აწამეს“, – დასძინა ლუბინეცმა.
ცნობილია, რომ საწამებელი კამერები უკრაინის სხვადასხვა დეოკუპირებულ ქალაქებშია აღმოჩენილი. ისინი აღმოაჩინეს ხერსონის რეგიონის გათავისუფლებულ ტერიტორიებზეც.
ლუბინეცმა აქამდეც აღნიშნავდა, რომ წარმოუდგენელია ხერსონის მაცხოვრებლებზე ძალადობის მასშტაბი. რუსი ჯარისკაცები ადგილობრივი მოსახლეობას აწამებდნენ ელექტრო შოკით. იყო ძვლების დამტვრევის შემთხვევები… ქალაქში იპოვეს ზურგზე ხელებშეკრული კაცის ცხედარი, რომელსაც თავში ჰქონდა ნასროლი.
ლუბინეცის თქმით, კამერები წამებისთვის მოწყობილი ჰქონდათ ხერსონის მარჯვენა სანაპიროს მთელ ტერიტორიაზე, სადაც უკრაინელებმა აღმოაჩინეს სექსუალური ძალადობის, დამცირებისა და ცემის კვალი.
ოქტომბრის მონაცემებით, გამოძიება უკვე დაიწყო 43 სისხლის სამართლის საქმეზე, ოკუპანტების მიერ მშვიდობიანი მოსახლეობის მიმართ სექსუალურ დანაშაულებებთან დაკავშირებით.
უფლებადამცველმა ორგანიზაცია Amnesty International-მა ომის შესახებ მოხსენებაში რუსეთი კაცობრიობის წინააღმდეგ ჩადენილ დანაშაულში ამხილა.
