ნეტგაზეთი • RU

რუსეთში დაისჯება ყველა, ვინც ჟანგიან ავტომატებზე, ტანსაცმლის, საკვების არქონაზე ისაუბრებს – ФСБ

ФСБ-ს ბრძანება №547, რომელიც პირველი დეკემბრიდან ძალაშია, ფაქტობრივად, კრძალავს რუსეთის არმიის შესახებ ნებისმიერი ინფორმაციის გავრცელებას.

ბრძანება ადგენს რუსეთის ფედერაციის სამხედრო და სამხედრო-ტექნიკურ საქმიანობასთან დაკავშირებულ იმ ინფორმაციას, რომელიც უცხო ქვეყნის წყაროებმა შესაძლოა ქვეყნის უსაფრთხოების წინააღმდეგ გამოიყენონ. ასეთ ცნობებად კი დოკუმენტი რუსეთის არმიის შესახებ ნებისმიერ ინფორმაციას განსაზღვრას.

როგორც Север.Реалии წერს, ბრძანება შეეხება მობილიზებულების ნათესავებსა და ოჯახის წევრებსაც, რომლებსაც მობილიზებულთა პრობლემებზე საჯაროდ ლაპარაკის შემთხვევაში „უცხო ქვეყნის აგენტის“ სტატუსი ემუქრებათ.

ინფორმაცია ჟანგიან ავტომატებზე, ტანსაცმლის, საკვებისა და ტყვიების არქონაზე, მეთაურების მხრიდან მუქარასა და მომზადების ნაკლებობაზე ხელისუფლებამ შესაძლოა რუსეთის ფედერაციის უსაფრთხოების დამაზიანებელ ცნობებად მიიჩნიოს.

„ხელისუფლება მორიგ ჯერზე უჭერს ჭანჭიკებს“, – მიიჩნევს სამოქალაქო მოძრაობა „მოქალაქე და არმიის“ ხელმძღვანელი სერგეი კრივენკო. – „ეს ეხება არამხოლოდ „უცხოეთის აგენტებს“, არამედ ჩვეულებრივ მოქალაქეებს, რომლებიც ასევე შეიძლება მიიჩნიოს ხელისუფლებამ სახელმწიფოს დამაზიანებელი ინფორმაციის გამავრცელებლებად. ეს ბრძანება პირდაპირ ეწინააღმდეგება სახელმწიფო საიდუმლოების შესახებ კანონს, რომელშიც ცხადადაა ნათქვამი, რომ სახელმწიფო საიდუმლოება ვერ იქნება ინფორმაცია, რომელიც ადამიანის უფლებების დარღვევას შეეხება.“

მედიის ცნობით, მობილიზაციის შესახებ გამოთქმული უკმაყოფილების გამო ხელისუფლება უკვე დევნის მობილიზებულებსაც და მათ ნათესავებსაც.

ორი კვირის წინ ბატაისკის საქალაქო სასამართლომ არმიის „დისკრედიტაციისთვის“ 30 ათასი რუბლით ($480) დააჯარიმა ერთ-ერთი მობილიზებულის და. ოლესია შიშკანოვამ ინტერნეტში გამოაქვეყნა 23 წლის ძმის მიერ უკრაინიდან გამოგზავნილი ვიდეო, რომელშიც ის და მისი თანამებრძოლები აღჭურვილობისა და იარაღის არქონაზე ჩიოდნენ.

როგორც 23 ნოემბერს გახდა ცნობილი, 155-ე ბრიგადის ქვეითები, რომლებმაც უკმაყოფილება ღია წერილით გამოხატეს, ხელისუფლებამ დასაჯა იმით, რომ ისინი ფრონტის წინა ხაზზე გააგზავნა.

უფლებადამცველები ამბობენ, რომ ასეთი რეპრესიების გამო, მობილიზებულთა ახლობლების ნაწილი უკვე გაჩუმებას ამჯობინებს.

„თავიდან ალბათ იქნება გარკვეული რეპრესიები, რამდენიმე საჩვენებელი ისტორია“, – ვარაუდობს სერგეი კრივენკო. – „ხელისუფლება შეაწუხა გამოთქმულმა უკმაყოფილებამ – მე ამას პროტესტებს ვერ დავარქმევდი – და ახლა მის ჩახშობას ცდილობს“.

___

ამავე თემაზე:

გიჩივლებთ, დამიბრუნეთ ჩემი შვილი – ტყვეობაში მყოფი რუსი ჯარისკაცის დედა პუტინს მიმართავს

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.