გამომგონებელი მოსწავლეები ბათუმიდან, რომლებმაც უნივერსიტეტების დაფინანსება უკვე მოიპოვეს

ანრი მამულაძე და დავით ჭურკვეიძე ბათუმელი გამომგონებელი მოსწავლეები არიან.

ორივე სკოლა „პროგრესში“ სწავლობს და ყველაზე მეტად STEM მიმართულებით არიან დაინტერესებულნი. ანრის გუნდმა სპეციალური პრიზი მოიპოვა „ათასწლეულის ინოვაციების კონკურსში“, დავითი კი „ლეონარდო და ვინჩის“ კონკურსის გამარჯვებულია.

„ჩვენ შევქმენით ხელსაწყო, რომელსაც მეღვინეების მარჯვენა ხელი ვუწოდეთ პირობით და „სმარტ დამრევი“ დავარქვით. გამოგონებამ პირველი ადგილი აიღო“, – გვეუბნება დავით ჭურკვეიძე, რომელიც მე-9 კლასის მოსწავლეა.

მისი თქმით, ეს ხელსაწყო აქამდე არსებულებისგან იმით განსხვავდება, რომ სამი ფუნქცია აქვს და ყველა ტიპის ღვინის წარმოებაში გამოიყენება.

„ხელსაწყოს შეუძლია ავტომატური მორევა, შაქრიანობის, ტემპერატურის შემოწმება. აქამდე არსებულ ხელსაწყოებს, მაგალითად, ვერ დაამონტაჟებდი ქვევრებში, ჩვენი ხელსაწყოს დამონტაჟება კი შესაძლებელია.

ხელსაწყო ფასითაც ხელმისაწვდომია და იმაზე უფრო იაფია, ვიდრე სხვები“, – ამბობს დავითი.

მისი აზრით, „სმარტ დამრევი“ არ მარტო ქართულ ბაზარზე გახდება პოპულარული. „არ გამოვრიცხავთ, რომ საქართველოს გარდა სხვა ღვინის ქვეყნებშიც დაინტერესდებიან ამით“, – გვეუბნება დავითი.

მისი თქმით, ხელსაწყოს შექმნის იდეა დაიბადა გაკვეთილზე, სადაც იმის შესახებ იყო მსჯელობა, როგორ შეუძლია საქართველოს გაზარდოს ხარისხიანი ღვინის წარმოება.

დავითის ჯგუფში კიდევ ორი მოსწავლე – ნია როხვაძე ქუთაისიდან და სერგო ბეგიაშვილი თბილისიდან იყვნენ ჩართული. ბავშვებთან ორი მენტორი მუშაობდა.

„გარკვეული პერიოდი „ზუმით“ ვმუშაობდით, მაგრამ ბოლო ორი კვირა თბილისში ვიყავი და პრაქტიკული სამუშაო ერთად გავიარეთ.

რესურსების შეძენაში, რა თქმა უნდა, გვეხმარება სკოლაც, რაღაც ნივთების შეძენაში მენტორებიც დაგვეხმარნენ.

მოტივაციას, რა თქმა უნდა, გვაძლევს მასწავლებელი, რომ მეტი ინტერესი გაგვიჩნდეს ტექნოლოგიების, გამომგონებლობის მიმართ, თუმცა მნიშვნელოვანია, რომ ამაში ხელს გიწყობდეს სასკოლო გარემოც.

ბათუმში არ ვიცი არსებობს თუ არა ტექნოპარკი, მაგრამ მე პირადად კომპიუტერული მეცნიერებები რადგან მაინტერესებს, STEM ჯგუფში ვარ გაწევრიანებული და იქ გვაქვს შესაძლებლობა, სიახლეებზე ვიმუშაოთ.

ვფიქრობ, ძალიან მნიშვნელოვანია ინოვაციებზე მუშაობა, რომ არ ჩამოვრჩეთ ტექნოლოგიურ განვითარებას. საბუნებისმეტყველო მეცნიერებების განვითარებაში მეტი რესურსი უნდა ჩაიდოს. ფიზიკა, ქიმია, ბიოლოგია, მათემატიკა, ეკონომიკა უნდა განვითარდეს. მე პირადად კომპიუტერული მეცნიერება მაინტერესებს ძალიან და ბუნებრივია, მინდა, რომ STEM მიმართულებაც გაძლიერდეს სკოლებში“, – ამბობს დავითი.

დავითმა და მისმა თანაგუნდელებმა გამოგონებისთვის ჯილდოდ სრული სასწავლო გრანტი მიიღეს ქუთაისის საერთაშორისო უნივერსიტეტში, სტემ მიმართულებით.

„არ ვიცი, რა შემოთავაზებები მექნება კიდევ მომავალში, ვნახოთ და ამის მიხედვით გავაკეთებ არჩევანს“, – გვითხრა დავითმა.

დავითის მსგავსად, ანრი მამულაძეც კომპიუტერული ელექტრონიკით არის დაინტერესებული. ის მე-10 კლასში სწავლობს. მისმა გუნდმა „ათასწლეულის ინოვაციების კონკურსში“ გაიმარჯვა.

ანრის გუნდმა კონკურსზე „თოჯინა გიდი“ წარადგინა, რომელიც რამდენიმე ენაზე, მათ შორის ქართულ, ინგლისურ და ესპანურ ენაზე, საუბრობს.

ფინალისთვის „თოჯინა გიდის“ ფუნქციები გააუმჯობესეს და კიდევ ერთი „გოგონა გიდით“ შეავსეს, რომელსაც კოორდინატების ამოცნობის ფუნქცია აქვს.

„ვფიქრობთ, ტურისტებისთვის ძალიან საინტერესო აპლიკაცია იქნება, რადგან „გიდი“ იმ კუთხის ისტორიას გიყვება, სადაც იმოგზაურებ.

რომელ კუთხეში წახვალ, გიდი იმ კუთხისთვის დამახასიათებელ ატრიბუტს ჩაიცვამს. მაგალითად, თუ კახეთში ხართ, „გიდი“ დაიხურავს კახურ ქუდს და მოგიყვებათ კახეთის ისტორიას“, – გვეუბნება ანრი.

მისი თქმით, პროექტი მზად არის, თუმცა აპლიკაცია ჯერ არ არის ჩაშვებული.

ანრიც რესურსების გაზრდაზე საუბრობს, რომ უფრო მეტი ახალგაზრდა დაინტერესდეს თანამედროვე ტექნოლოგიებით და გამომგონებლობით.

ბათუმში, სკოლის გარდა, სხვა რესურსებს ვერც ის შოულობს, უპირატესობას ანიჭებს სასკოლო გარემოში არსებულ ტექნოკლუბს და ონლაინ პლატფორმას.

კონკურსში გამარჯვების შემდეგ ანრი და მისი თანაგუნდელები სტიპენდიით დააჯილდოვეს.

ანრი სან-დიეგოს ამერიკულ უნივერსიტეტში სრული დაფინანსებით ისწავლის.

სტემის გარდა ანრი მუსიკითაც არის დაინტერესებული და ბსუ-ს ბენდში გიტარაზე უკრავს.

_____________________

მთავარი ფოტო: დავით ჭურკვეიძე და ანრი მამულაძე/STEM კონკურსში გამარჯვებული მოსწავლეები