ვოლოდიმირ ზელენსკი მზადაა განიხილოს ყირიმის არასამხედრო გზით დაბრუნების ვარიანტები, თუმცა ყველას მოუწოდებს, ნუ დაკარგავენ დროს უკრაინისთვის ისეთი ვარიანტების შეთავაზებაზე, რომლებიც ნახევარკუნძულის დეოკუპაციას არ ითვალისწინებს.
„მესმის, რომ ყველა შეშფოთებულია სიტუაციით და იმით, რა იქნება ყირიმთან დაკავშირებით. თუ ვინმე მზადაა, შემოგვთავაზოს ყირიმის არასამხედრო გზით დეოკუპაციის შესაძლებლობა, მე მხოლოდ გამიხარდება… თუმცა თუ გამოსავალი არ ითვალისწინებს დეოკუპაციას და ყირიმი რჩება რუსეთის ფედერაციის ნაწილად, ამაზე ლაპარაკი უბრალოდ დროის კარგვაა“, – ამბობს ზელენსკი Financial Times-სთან ინტერვიუში.
გამოცემის ცნობით, ზოგიერთი დასავლელი პარტნიორი შეშფოთებულია იმით, რომ უკრაინის მხრიდან ყირიმის დაბრუნების ნებისმიერმა მცდელობამ შესაძლოა ვითარების ესკალაცია გამოიწვიოს. არ გამოირიცხება ბირთვული იარაღის გამოყენებაც.
ზელენსკი აღნიშნავს, რომ უკრაინის სამოქალაქო ინფრასტრუქტურაზე სარაკეტო თავდასხმები ცხადად მიუთითებს – მოსკოვი ომის დასასრულებლად მოლაპარაკებების წარმოებას არ აპირებს.
მისი თქმით, რუსეთის ახალი სტრატეგია, გაანადგუროს უკრაინის ინფრასტრუქტურა და მთელი ქვეყანა ჩააბნელოს, უკრაინელთა სიმტკიცეს ვერ შეასუსტებს.
„ჩვენ უნდა დავიბრუნოთ ყველა ტერიტორია… თუ თქვენ არ შეგიძლიათ თქვენი მიწების სრულად დაბრუნება, ომი უბრალოდ იყინება და მისი განახლება მხოლოდ დროის საკითხია,“ – ამბობს ზელენსკი და დასძენს, რომ ომის დასრულება შეუძლებელი იქნება, თუ რუსეთი ყველა ოკუპირებულ ტერიტორიას არ დატოვებს.
