„აქ მოსვლამდე არანაირი სიღრმისეული ცოდნა არ მქონდა ჟურნალისტიკაზე. რეალურად 7 წელია ამ სფეროთი ვარ დაინტერესებული. ვერც სოციალური ქსელი, ვერც სხვა პლატფორმა, ვერაფერი ვერ დამეხმარა იმ ცოდნის მიღებაში, რომელიც მჭირდებოდა. აქ მოსვლა კი გარდამტეხი აღმოჩნდა ჩემთვის. ბევრი რამე სხვანაირად დავინახე და უფრო დადებითად განვეწყვე ჟურნალისტური საქმიანობის მიმართ,“ – ამბობს მე-11 კლასის მოსწავლე მარიამ სურმანიძე.
მარიამი და კიდევ სხვადასხვა სკოლის 16 მოსწავლე აჭარიდან „ბათუმელების“ მედიასკოლის მონაწილეები არიან. „მედიაწიგნიერების სკოლა“- ამ პროექტს „ბათუმელები“ ახორციელებს „ბათუმის ამერიკულ კუთხესთან“ ერთად.
მედიასკოლის მონაწილეები სამთვიან ინტენსიურ კურსს გადიან ჟურნალისტიკასა და მედიაწიგნიერებაში. კურსის მიმდინარეობისას სწავლობენ ახალი ამბებისა და ვიდეო/ფოტომასალის მომზადებას, ინტერვიუს ჩაწერის ტექნიკას.
მე-11 კლასის მოსწავლე ელენე თავართქილაძეც მედიასკოლის მონაწილეა. 13 წლის იყო, როცა ჩანაწერების გაკეთება დაიწყო. ბლოგის გაკეთება უნდოდა, თუმცა არ იცოდა ეს ისე როგორ მოეხერხებინა, რომ მისი ვინაობა არ გამოჩენილიყო. მედიასკოლაში მისვლის მიზეზი მისთვის ისეთი ცოდნის მიღების სურვილი აღმოჩნდა, რომელსაც გამოიყენებდა.
“ბათუმელების” მედიასკოლის მონაწილეები
„მოლოდინები გამიმართლდა. ვიცოდი, რომ რაღაც ისეთს ვისწავლიდი, რაც მომავალში გამომადგებოდა. ჯერ არ გამომიყენებია, მაგრამ ვფიქრობ, რომ აქ მიღებული ცოდნა გამომადგება. შეიძლება დამაფიქროს ჩემს მომავალ კარიერაზე და ხელი შეუწყოს ჩემს განვითარებას,“ – ამბობს ელენე.
„არ ვიცოდი, რომ „მეოთხე ხელისუფლება“ იყო ჟურნალისტიკა და არც ის, ამხელა ძალა თუ გააჩნდა. ახლა ვხედავ რამდენად საპასუხისმგებლო საქმეა, იმიტომ, რომ თუ რამე შეგეშლება, ამით შეიძლება ცუდი ზეგავლენა მოახდინო მთლიანად საზოგადოებაზე.
მედიასკოლაში სწავლისას ჟურნალისტიკის მნიშვნელობა უფრო გავაანალიზე და ისიც დავინახე, თუ რამდენად შემიძლია, მე ჩემს ცხოვრებაში ამ გზას გავყვე,“ – ამბობს მე-15 საჯარო სკოლის მოსწავლე დეა მუთიძე.
მედიასკოლის მონაწილეები აჭარაში მდებარე სხვადასხვა სკოლების მოსწავლეები არიან.
„აქ მოსვლის შემდეგ ჟურნალისტიკამ კიდევ უფრო დამაინტერესა. შეიძლება ჩემი მომავალი პროფესიაც ჟურნალისტიკა იყოს“, – ამბობს მეცხრე კლასის მოსწავლე გიორგი მორთულაძე.
“ბათუმელების” მედიასკოლის მონაწილეები
მედიასკოლაში მონაწილეობის მნიშვნელობაზე საუბრისას სკოლის მოსწავლეები ამბობენ, რომ მედიასკოლა მათ ეხმარება უფრო გლობალურად შეხედონ მოვლენებს.
„როდესაც პროფესიონალებს ხვდები, რომლებიც თავის სფეროზე და საქმიანობაზე გიყვებიან, ეს უფრო ფართოდ გაჩვენებს რაღაცებს. ამიტომ, შეიძლება ითქვას, აქ მოსვლით გამართლდა ის მოლოდინები, რაც მქონდა.
მაგალითად, რაღაც დონეზე წარმომედგინა, როგორი უნდა ყოფილიყო ინტერვიუ, მაგრამ აქ მიღებულმა ინფორმაციამ, კიდევ უფრო გამიღრმავა ეს ცოდნა. დამანახა, როგორ მუშაობენ ჟურნალისტები. ეს მუშაობის პრინციპი იყო ძალიან საინტერესო,“ – ამბობს მედიასკოლის კიდევ ერთი მონაწილე, ნინი თურაძე.
მედიასკოლაში სწავლა 3 თვეს გაგრძელდება.
