ნეტგაზეთი • RU

სტამბოლში აფეთქების შედეგად 6 ადამიანი დაიღუპა, 81 კი დაშავდა

6 ადამიანი დაიღუპა და 81 დაშავდა სტამბოლის ცენტრალურ და ყველაზე ხალმხრავალ ქუჩაზე, ისტიკლალზე მომხდარი აფეთქებისას.

შემთხვევა დღეს, 13 ნოემბერს მოხდა, თურქეთის დროით 16:20 საათზე.

კადრებში, რომელიც შემთხვევის ადგილიდან ვრცელდება ჩანს, რომ ისტიკლალზე მობილიზებულია პოლიცია, სასწრაფო და სახანძრო დახმარების მანქანები.

აფეთქების შემდეგ პირველი განცხადება გააკეთა სტამბოლის მერმა ეკრემ იმამოღლუმ.

„ისტიკლალის ქუჩაზე მომხდარი აფეთქების შედეგად დაშავებულებს სწრაფ გამოჯანმრთელებას ვუსურვებ. გთხოვთ, მკაცრად დაიცვათ დანაშაულის ადგილზე მყოფი პირველადი დახმარების ჯგუფების მითითებები და არ დაეყრდნოთ შეცდომაში შემყვან პოსტებს, გარდა ოფიციალური განცხადებებისა,“ – დაწერა სტამბოლის მერმა თავის ოფიციალურ ტვიტერის ანგარიშზე.

ჯერჯერობით უცნობია აფეთქების ზუსტი მიზეზები. აფეთქების ადგილას დაიკეტა ყველა მაღაზია.

განახლება: სტამბოლის გუბერნატორის ალი ერლიკაის განცხადებით, აფეთქების შედეგად დაღუპულთა რიცხვი 6-მდე, ხოლო დაშავებულთა – 81-მდე გაიზარდა.

სტატიის თავდაპირველი სათაური იყო: სტამბოლში აფეთქების შედეგად 1 ადამიანი დაიღუპა, 11 კი დაშავდა

ნეტგაზეთის მასალების სხვა გამოცემებში გადაბეჭდვის წესი
ავტორი