კომპანია კაჩინსკების ქუჩაზე საფეხმავლო ხიდის მოწყობის ნებართვას ითხოვს

ბათუმში არსებობს პრაქტიკა, როცა სამშენებლო კომპანიები საკუთარ ტერიტორიას მაქსიმალურად ითვისებენ მშენებლობისთვის და ბოლოს ახსენდებათ, რომ არ აქვთ ეზო და ადგილი პარკინგისთვის, რაც ზოგჯერ უსაფრთხოების პრობლემასაც უკავშირდება.

შემდეგ დანაკლისის შესავსებად, ნაკვეთებს სახელმწიფოსგან ითხოვენ. „ბათუმელები“ მსგავს შემთხვევებზე ბევრჯერ წერდა.

ამჯერად უსაფრთხო გადასასვლელის მოსაწყობად სახელმწიფოს ტერიტორიის გამოყენება „ელთ ბილდინგს“ სურს. კომპანია მშენებარე კორპუსის მიმდებარედ საავტომობილო გზაზე საფეხმავლო გადასასვლელის მოწყობის ნებართვას ითხოვს, შესაბამისი არქიტექტორული პროექტი მერიას უკვე წარუდგინა.

ეს გადასასვლელი „ერთ ბილდინგს“ შესაძლებლობას მისცემს საკუთარ მომხმარებელს ქუჩის მეორე მხარეს, ზღვაზე უსაფრთხო გადასასვლელით სარგებლობაც შესთავაზოს, უფრო მეტიც, პროექტის განხორციელების შემთხვევაში, ეს საფეხმავლო ხიდი „ელთ ბილდინგის“ მომხმარებელს პირდაპირ ბულვარის პრომენადზე გადასვლის საშუალებას მისცემს.

მერიაში წარდგენილი დოკუმენტების მიხედვით საფეხმავლო ხიდზე მოეწყობა როგორც კიბე ასევე ლიფტი.

პროექტის მონაცემები – შენების ფართობი: 30.82 მ სამშენებლო ფართობი: 105.94 მ; სიგრძე: 22.0 მ. სიგანე: 2.50 მ. სავალი ნაწილის სიმაღლე ქუჩიდან: 5.50 მ. ხიდის ქვედა კიდის სიმაღლე ქუჩიდან: 4.50 მ. მალის მაქსიმალური სიგრძე: 9.75 მ. სავალი ნაწილის ფართობი: 99.42 მ

შპს „ელთ ბილდინგი“ კაჩინსკების ქუჩაზე მრავალბინიან კორპუსს აშენებს. კომპანიის ასი პროცენტის მფლობელი ელგუჯა თურმანიძეა.