დიდი ბრიტანეთის დაზვერვის ცნობით, რუსეთი ყირიმის ხიდზე სამუშაოებს განაგრძობს, თუმცა ნაკლებსავარაუდოა, რომ ხიდის სრულად აღდგენას 2023 წლის სექტემბრამდე მოახერხებს.
უწყება აღნიშნავს, რომ 8 ნოემბერს ახალი, 64-მეტრიანი მალის გადასატანად და დასამონტაჟებლად რუსებს ხიდის საავტომობილო ნაწილის დაკეტვა მოუწიათ, გზის დაზიანებული მონაკვეთების შესაცვლელად კი სამი დამატებითი მალი იქნება საჭირო. ამავე დროს, ირკვევა, რომ ხიდის დაზიანებულ მონაკვეთზე მიმდინარე სამუშაოები საგზაო მოძრაობას აფერხებს.
„დაზიანებული სარკინიგზო ხიდის შეცვლა, კონტრაქტის თანახმად, 2023 წლის სექტემბერში უნდა დასრულდეს, თუმცა როგორც რუსეთის ვიცე-პრემიერმა განაცხადა, რემონტის დრო შესაძლოა შეამცირონ,“ – წერს დაზვერვა 9 ნოემბრის რელიზში და დასძენს, რომ სამუშაოები ზამთრის თვეებში დიდწილად ამინდზე იქნება დამოკიდებული.
უწყების ცნობით, ამჟამად, ხიდზე ერთი გზა გახსნილია, თუმცა სარკინიგზო ტრანსპორტის გადაადგილება შეზღუდულია.
დაზვერვის შეფასებით, ქერჩის ხიდზე თავდასხმამ სერიოზულად შეაფერხა ყირიმსა და სამხრეთ უკრაინაში მარაგების შევსება და შეამცირა რუსეთის შესაძლებლობა, გადაიტანოს სამხედრო აღჭურვილობა და გადაიყვანოს პირადი შემადგენლობა რკინიგზით ან საავტომობილო ტრანსპორტით.
„ხიდის დაზიანება, თავდასხმა სევასტოპოლში შავი ზღვის ფლოტზე და ხერსონიდან შესაძლო გასვლა – ეს ყველაფერი ძალიან უშლის ხელს მოსკოვს, სამხედრო წარმატების სურათი დახატოს,“ – ასკვნის დაზვერვა.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში დაზვერვა წერდა, რომ ფრონტის მთელ ხაზზე რუსეთმა თავდაცვის სიმაგრეების მშენებლობა დაიწყო და ამისთვის იყენებს პირამიდის ფორმის ტანკსაწინააღმდეგო კონსტრუქციას, რომელიც „დრაკონის კბილების“ სახელითაა ცნობილი.
