4 ნოემბერს, პარასკევს, დასავლეთ თურქეთში, იზმირის პროვინციაში მიწისძვრა მოხდა. მედიის ცნობით, რამდენიმე ადამიანი დაშავდა სახლებიდან გაქცევის დროს და ჩამოინგრა მეჩეთის მინარეთი.
გამთენიისას, 3:29 საათზე, მომხდარი მიწისძვრის სიმძლავრე 4,9 მაგნიტუდა იყო, მიწისძვრას რამდენიმე ბიძგიც მოჰყვა და იგრძნობოდა მიმდებარე რაიონებში.
მსხვერპლის და სხვა ზარალის შესახებ ინფორმაცია არ ვრცელდება, თუმცა მედიის ცნობით, 31-მა ადამიანმა მიმართა საავადმყოფოს პანიკის გამო, რამდენიმე ადამიანი კი დაშავდა მიწისძვრის დროს სახლების ფანჯრებიდან გადმოხტომის დროს.
ოფიციალური პირების ცნობით, მიწისძვრის შემდეგ დაახლოებით 20 საცხოვრებელ კორპუსს გაუჩნდა ბზარები.
იზმირი მიწისძვრისგან ერთ-ერთი ყველაზე დაზარალებული რეგიონია თურქეთში. ორი წლის წინ, 2020 წლის 30 ოქტომბერს, მიწისძვრამ იზმირში 117 ადამიანი იმსხვერპლა.
____________
ფოტო: haber
