ქობულეთში, ხინოწმინდაში, VIII-IX საუკუნეებით დათარიღებულ ნაეკლესიარს პემზის ბლოკი დააშენეს.
ნაეკლესიარი არქეოლოგიური ძეგლია.
ფოტოები, რომლებზეც ჩანს უძველეს ნაშთებზე დაშენება, თავად აჭარის კულტურული მემკვიდრეობის დაცვის სააგენტომ გაავრცელა.
„ხინოწმინდაში იოანე ნათლისმცემლის თავის კვეთის ტაძრის აღდგენით სამუშაოებს სააგენტოს მონიტორინგის ჯგუფი, სააგენტოს ხელმძღვანელთან ერთად, ადგილზე გაეცნო და შეაფასა. სამუშაოები ვადების დაცვით ხორციელდება და დაგეგმილთან ზუსტ თანხვედრაშია.
ხინოწმინდის სარეაბილიტაციო სამუშაოები სრულიად 2023 წლის ბოლოს დასრულდება, მისი აღდგენისთვის 750 000 ლარი დაიხარჯება,“ – ეს არის ინფორმაცია, რომელიც ფოტოებთან ერთად სააგენტომ გაავრცელა.
ქობულეთში, ხინოწმინდაში VIII-IX საუკუნის ძეგლს პემზის ბლოკი დააშენეს
ნაეკლესიარის რეაბილიტაციის ნებართვა კულტურული მემკვიდრეობის დაცვის სააგენტომ გასცა. ხოლო ტენდერი „ხინოს მამათა მონასტრის ეკლესიის სარეაბილიტაციო სამუშაოებზე (აღდგენა)“ აჭარის კულტურული მემკვიდრეობის დაცვის სააგენტომ [კმდს] გამოაცხადა. პირობის მიხედვით, სამუშაოები 2023 წლის პირველ დეკემბრამდე უნდა დასრულდეს.
„ბათუმელები“ ხინოწმინდის ნაეკლესიარის რეაბილიტაციის პროექტზე მიმდინარე წლის მაისში წერდა. სპეციალისტები აკრიტიკებდნენ სააგენტოს პროექტს და ამბობდნენ, რომ ეს ძეგლს გაანადგურებდა, რადგან მიმდინარეობდა არა რეაბილიტაცია, არამედ სრულიად ახალი ეკლესიის მშენებლობა.
ასე გამოიყურება მე-8-მე-9 საუკუნეებით დათარიღებული არქეოლოგიური ძეგლი მას შემდეგ, რაც მას პემზის ბლოკი დააშენეს
ამავე თემაზე:
ხინოწმინდაში ძეგლზე ეკლესიას ააშენებენ, აჭარის ბიუჯეტიდან 750 ათასი ლარი დაიხარჯება
