რუსმა მილიარდერმა ნიკოლაი სტორონსკიმ, რომელიც ბრიტანეთში საფინანსო-ტექნოლოგიური კომპანია Revolut-ის თანადამფუძნებელია, რუსეთის მოქალაქეობაზე უარი თქვა.
„ნიკი ბრიტანეთის მოქალაქეა“ – განაცხადეს კომპანიაში, რომელმაც გამოცემა Forbes-ს დაუდასტურა, რომ სტორონსკიმ რუსეთის მოქალაქეობა დატოვა.
Revolut-ის წარმომადგენლებს მისი გადაწყვეტილების მიზეზი არ განუმარტავთ, თუმცა როგორც მანამდე ბრიტანულ The Telegraph-თან საუბარში აღნიშნეს, ეს უკრაინაში რუსეთის ომს უკავშირდება, რადგან ბიზნესმენი პოზიცია ომთან დაკავშირებით მანამდეც საყოველთაოდ ცნობილი იყო და „ის კვლავაც კატეგორიულად მოითხოვს, შეწყდეს საომარი მოქმედებები“.
ფინტექს-სტარტაპი Revolut 2015 წელს ლონდონში დააფუძნეს ნიკოლაი სტორონსკიმ და მისმა უკრაინელმა ბიზნესპარტნიორმა ვლად იაცენკომ. გასული წლის ივლისში კომპანია 33 მილიარდ დოლარად იყო შეფასებული. თავად სტორონსკი კი 2022 წელს Forbes-ის რუს მილიარდერთა სიაში მე-16 ადგილს იკავებდა.
როგორც Forbes-ი წერს, რუსეთის უკრაინაში შეჭრის შემდეგ Revolut-მა დახმარება შესთავაზა უკრაინაში მყოფ თავის თანამშრომლებს და დახურა ოფისები რუსეთში. სტორონსკიმ კი ღიად გააკრიტიკა რუსეთის ხელისუფლება უკრაინაში ომის გამო და მას „გულისამრევი და არასწორი უწოდა.“
19 ოქტომბერს უკრაინამ სანქციები დაუწესა მილიარდერის მამას, „გაზპრომ-პრომგაზის“ გენერალურ დირექტორს, უფროს ნიკოლაი სტორონსკის. როგორც უკრაინის ეროვნული უსაფრთხოებისა და თავდაცვის საბჭოში განაცხადეს, უფროს სტორონსკის „უკრაინის დამოუკიდებლობის, სუვერენიტეტისა და ტერიტორიული მთლიანობის წინააღმდეგ მიმართული ქმედებების მატერიალურ-ფინანსურ მხარდაჭერაზე ეკისრება პასუხისმგებლობა“.
Revolut–ის წარმომადგენლები განმარტავენ, რომ სტორონსკიმ რუსეთის მოქალაქეობაზე უარი მანამდე თქვა, ვიდრე უკრაინა მამამისს სანქცირებულთა სიაში შეიყვანდა.
ნიკოლაი სტორონსკი უკვე მეოთხე ბიზნესმენია Forbes-ის რეიტინგის ახლანდელი და ყოფილი მონაწილეებიდან, რომელმაც ბოლო თვეებში რუსეთის პასპორტი დათმო.
მანამდე მოქალაქეობაზე უარი თქვა მილიარდერმა იური მილნერმა, რომელმაც რუსეთი ოჯახთან ერთად ჯერ კიდევ 2014 წელს დატოვა. მილნერი წელს Forbes-ის რუს მილიარდერთა რეიტინგში მე-15 ადგილზე იყო, მისი ქონება კი $7,3 მილიარდით ფასდებოდა.
სექტემბერში ერევანში დაბადებულმა რუსმა ბიზნესმენმა რუბენ ვარდანიანმა განაცხადა, რომ უარს ამბობდა რუსეთის მოქალაქეობაზე. 2021 წელს მისი ქონება $1 მილიარდით იყო შეფასებული.
ივნისში რუსეთის მოქალაქეობა დატოვა საინვესტიციო კომპანია Freedom Finance-ის დამფუძნებელმა ტიმურ ტურლოვმა. ის ბოლო 10 წელია ყაზახეთში ცხოვრობს და იმის გამო, რომ ყაზახეთი ორმაგ მოქალაქეობას არ უშვებს, მან რუსეთის პასპორტზე უარი თქვა. Forbes-ის შეფასებით, ტურლოვის ქონება 2022 წელს $2,4 მილიარდის ღირებულების იყო.
