უკრაინის სამხედრო დაზვერვის ინფორმაციით, რუსეთში, პსკოვის ოლქში, სამხედრო აეროდრომზე მომხდარი აფეთქების შედეგად ორი ვერტმფრენი Ka-52 განადგურდა.
„რუსეთის სამხედრო-საჰაერო ბაზაზე 31 ოქტომბრის ღამით ძლიერი აფეთქებები მოხდა. ორი მოიერიშე ვერტმფრენი Ka-52 „ალიგატორი“ სრულიად განადგურებულია, კიდევ ორი – სერიოზულად დაზიანდა“, – ნათქვამია დაზვერვის მიერ გავრცელებულ ცნობაში. დაზვერვა დასძენს, რომ ერთი Ka-52 „ალიგატორი“ დაახლოებით $ 16 მილიონი ღირს.
უწყების ინფორმაციით, მთელი სამხედრო ბაზის პირადი შემადგენლობა „დივერსანტების“ ძებნაშია ჩართული, მიმდინარეობს საგამოძიებო სამუშაოები. ჯერ კიდევ ზუსტდება სხვა ტიპის ტექნიკის დაზიანების ხარისხი და ასევე, ინფორმაცია სამხედროების დაღუპვისა და დაშავების შესახებ.
დღეს დილით ანონიმურ ტელეგრამარხებზე გავრცელდა ცნობები, რომ რუსეთში აფეთქება მოხდა სამხედრო-საავიაციო ბაზაზე, რომელიც პსკოვის ოლქში, რუსეთ-ლატვიის საზღვართან მდებარეობს.
31 ოქტომბერს დილიდან რუსეთმა კიევისა და უკრაინის ქალაქების დაბომბვა განაახლა. ძირითადი სამიზნე ამჯერადაც ენერგოინფრასტრუქტურაა.
რუსეთის საჰაერო დარტყმების შედეგად, კიევი, ხარკოვი და ზაპოროჟიე ნაწილობრივ ელექტროენერგიისა და წყლის გარეშეა დარჩენილი.
უკრაინის საჰაერო ძალების ინფორმაციით, რუსეთმა დაახლოებით 50 ფრთოსანი რაკეტა უკრაინისკენ როსტოვის რაიონიდან გაუშვა.
50-დან 44 რაკეტა უკრაინის საჰაერო თავდაცვის სისტემებმა ჩამოაგდო, თუმცა კიევსა და სხვა ქალაქებშიც რამდენიმე აფეთქება მაინც მოხდა.
