ომის კვლევის ამერიკული ინსტიტუტის (ISW) შეფასებით, რუსეთის პრეზიდენტი ვლადიმერ პუტინი ზამთარს ელოდება იმის გასარკვევად, შეარყევს თუ არა ყინვა და ცივი ამინდები უკრაინისადმი დასავლეთის მხარდაჭერას.
ინსტიტუტის ანალიტიკოსები ვარაუდობენ, რომ რუსეთი სამხედრო მოქმედებებს 2023 წლამდე უკვე არსებულ რეჟიმში განაგრძობს, არ მიმართავს ტაქტიკური ბირთვული იარაღს, მაგრამ ამავე დროს არც საკუთარ მიზნებზე იტყვის უარს.
„პუტინი, დიდი ალბათობით, გააგრძელებს სამხედრო ოპერაციას უკრაინაში, რათა შეინარჩუნოს უკვე ოკუპირებული ტერიტორიები, მოიპოვოს ახალი პოზიციები და შექმნას პირობები დასავლეთის მხარდაჭერის შესასუსტებლად – სწორედ ამისთვის ის ზამთარს ელოდება,“ – წერს ISW დღევანდელ ანგარიშში და დასძენს, რომ ნაკლებსავარაუდოა, პუტინმა NATO-სთან პირდაპირ სამხედრო კონფლიქტი მოინდომოს, თუმცა მოსალოდნელია, კვლავაც განაგრძოს მუქარა, რათა „დასავლეთის სიმტკიცე გატეხოს“.
ISW-ის აზრით, ახლახან დასრულებული მობილიზაცია და ყოველწლიური საშემოდგომო გაწვევა უკრაინაში მებრძოლი რუსული ჯარების პირადი შემადგენლობით შევსების ორ ტალღას ნიშნავს – ერთს მიმდინარე და უახლოეს კვირებში, მეორეს კი 2023 წლის გაზაფხულზე.
ანალიტიკოსების აზრით, ახლა მობილიზებულების უკრაინაში გაგზავნის მიზანი თავდაცვითი პოზიციების გამაგრებაა – უკრაინელთა კონტრშეტევების ფონზე რუსები ეცდებიან, ზამთრამდე პოზიციების შენარჩუნება მოახერხონ.
ISW ასევე მიმოიხილავს პუტინის მცდელობებს რუსული ენერგორესურსების შეწყვეტის გზით „გატეხოს ევროპა“ და უკრაინის მხარდაჭერაზე ხელი ააღებინოს.
ინსტიტუტის ანალიტიკოსები მიუთითებენ, რომ ევროპულმა ხელისუფლებებმა საკუთარი ხალხი უკვე მოამზადეს რთული ზამთრისთვის, მაქსიმალურად მოიმარაგეს ენერგორესურსები და შექმნეს პირობები ენერგიის მოხმარების შესამცირებლად.
„ეს ქმედებები ადასტურებს, რომ ევროპის ლიდერები მზად არიან ზეწოლისთვის, რომელსაც ისინი ცივი ზამთრის დასაწყისში აუცილებლად წააწყდებიან,“ – წერს ISW, რომლის აზრითაც, პუტინს იმედი აქვს, რომ ევროპა ამ ზეწოლას ვერ გაუძლებს. – „პუტინი დააკვირდება ზამთრის გავლენას ევროპელთა ნებაზე და შემდეგ გადაწყვეტს – გაგზავნის გაზაფხულზე უკრაინაში თავის ახალწვეულებს, თუ მოქმედების სხვა გეგმას აირჩევს.“
