რუსეთის ძალებს არანაირი სერიოზული წინსვლა არ აქვთ არც ბახმუტში და არც ფრონტის ხაზის რომელიმე სხვა მონაკვეთზე, სამხედრო წარმატებაზე ინფორმაციას ისინი უბრალოდ აყალბებენ – ასეთია ომის კვლევის ამერიკული ინსტიტუტის (ISW) შეფასება.
როგორც ინსტიტუტის ანალიტიკოსები უახლეს ანგარიშში მიუთითებენ, რუსეთის საინფორმაციო სივრცეში აქტიურად ვრცელდება ცნობები ბახმუტში რუსეთის ძალების წინსვლაზე. ISW-ის დასკვნით, ამ ნარატივის მიზანი, სავარაუდოდ, არმიაში საბრძოლო განწყობის ამაღლება და „ვაგნერის“ დამფინანსებლის ევგენი პრიგოჟინის პირადი რეპუტაციის გაზრდაა, რადგან სწორედ მისი ძალები ხელმძღვანელობენ ბახმუტის ოპერაციას.
„რუსეთის ძალებმა მინიმალურად წაიწიეს წინ ბახმუტში უკრაინელთა თავდაცვითი პოზიციებისკენ, თუმცა ძალიან ნელა და უდიდესი დანაკარგის ფასად. 23 ოქტომბერს პრიგოჟინმა აღიარა, რომ „ვაგნერი“ ნელა მიიწევს ბახმუტთან, თუმცა იქვე დასძინა, რომ დღეში 100-200 მეტრით წინსვლა თანამედროვე ომში სრულიად ნორმალური შედეგია,“ – წერს ISW.
ინსტიტუტი იქვე აღნიშნავს, რომ უკრაინელი სამხედროების ინფორმაციით, უკრაინის არმიას მყარად უჭირავს პოზიციები ფრონტის ამ მონაკვეთზე და რუსებმა იცრუეს, როდესაც განაცხადეს, რომ ბოლო რამდენიმე დღეში ბახმუტის გარშემო რამდენიმე ქალაქი დაიკავეს.
„სავარაუდოდ, რუსეთის ძალები აყალბებენ ინფორმაციას ბახმუტში სამხედრო პროგრესის შესახებ, რათა უკრაინის ჩრდილო-აღმოსავლეთსა და სამხრეთში მზარდი დანაკარგების ფონზე, წარმოაჩინონ თითქოს ფრონტის ერთ სექტორში მაინც აღწევენ წარმატებას. წინსვლის ასეთი მონაცემი (პრიგოჟინის მიერ დასახელებული) მექანიზებულ ომშიც კი მარცხი იქნებოდა, არათუ დღეს, თუმცა სინამდვილეში ეს მონაცემიც გადაჭარბებულია,“ – აღნიშნავენ ინსტიტუტის ექსპერტები.
ISW იქვე დასძენს, რომ პრიგოჟინისა და სხვა „სილოვიკების“ მზარდი გავლენის დასაბალანსებლად, სავარაუდოდ, პუტინმა გარკვეული უფლებამოსილებები დაუბრუნა სერგეი შოიგუს, რადგან ბოლო პერიოდში თავდაცვის მინისტრი მედიაში ძალიან ხშირად ჩნდება.
ISW-ის ანგარიშის მთავარი მიგნებები:
- რუსეთის ძალებს არანაირი პროგრესი არ აქვთ არც ბახმუტში და არც ფრონტის რომელიმე სხვა მონაკვეთზე;
- პრეზიდენტმა ვლადიმერ პუტინმა და თავდაცვის მინისტრმა სერგეი შოიგუმ „ნაწილობრივი მობილიზაცია“ დასრულებულად გამოაცხადეს;
- სავარაუდოდ, პუტინი საინფორმაციო სივრცეში სერგეი შოიგუს რეაბილიტაციას ცდილობს, რათა ამით ომის მომხრე „სილოვიკების“ მზარდი გავლენა დააბალანსოს;
- „სილოვიკების“ გავლენის ზრდა ბზარს აჩენს რუსეთის ომის მომხრე საზოგადოებაში;
- რუსული წყაროების ცნობით, უკრაინულმა არმიამ რამდენიმე შეტევა მიიტანა კრემენაია-სვატოვოს მიმართულებაზე;
- რუსეთის ძალები განაგრძობდნენ მობილიზებული სამხედროების განლაგებას და თავდაცვითი პოზიციების გამაგრებას ხერსონში, მდინარე დნეპრის დასავლეთ სანაპიროზე;
- რუსული წყაროების მტკიცებით, უკრაინელებმა შეტევა მიიტანეს ხერსონის ოლქის ჩრდილო-აღმოსავლეთით;
- რუსეთის არმია განაგრძობდა სახმელეთო შეტევებს დონეცკის ოლქში;
- რუსეთის საოკუპაციო ძალებმა ოკუპირებული ხერსონის ოლქის რაიონებიდან „ევაკუაცია“ დაასრულეს;
- რუსეთის საოკუპაციო ძალები ოკუპირებულ ტერიტორიებზე მცხოვრებ უკრაინელებს რუსეთის მოქალაქეობის მიღებას აიძულებენ, სავარაუდოდ, იმისთვის, რომ სავალდებულო სამხედრო სამსახურში უკრაინის მოქალაქეების გაწვევა გაამართლონ;
- რუსეთის საოკუპაციო ძალები განაგრძობენ მცდელობას, წაშალონ უკრაინული ისტორია, კულტურა და ეროვნული იდენტობა უკრაინის ოკუპირებულ რეგიონებში.
