ბათუმის მერია გაეროს ბავშვთა ფონდისგან [ UNICEF] გრანტის სახით 868 560 ლარს მიიღებს, ამ თანხას ბათუმში მცხოვრებ უკრაინელ და მათთან ერთად იმ ბავშვებს გაუნაწილებენ, რომლებიც მოწყვლად ჯგუფებს წარმოადგენენ.
მერიის ინფორმაციით, ამ გრანტის ფარგლებში თანხას სულ 3 696 ბავშვი მიიღებს, თითოეულს 235 ლარი შეხვდება.
მერია განმარტავს, რომ UNICEF-ი და ბათუმის მერია ამ დახმარების გაცემას უახლოეს მომავალში გეგმავენ იმისათვის, რომ „ოჯახებმა ზამთრის სეზონზე გაზრდილი საჭიროებების დაკმაყოფილება შეძლონ.“
გრანტის მიღებასთან დაკავშირებით ბათუმის მერმა, არჩილ ჩიქოვანმა საკრებულოს მიმართა და გაეროს ბავშვთა ფონდისგან [UNICEF] გრანტის მიღებაზე საქართველოს მთავრობასთან შუამდგომლობა ითხოვა:
„საქართველოს მთავრობისთვის შუამდგომლობის წარდგენასა და საგრანტო ხელშეკრულების გაფორმებაზე თანხმობის გაცემის შესახებ“ – განკარგულების პროექტი საკრებულოს უკვე მზად აქვს და მას 31 ოქტომბერს დაგეგმილ სხდომაზე უყრის კენჭს.
მერიის ინფორმაციით, თანამშრომლობის ფარგლებში გრანტი ბავშვებისთვის თავად ორგანიზაციამ შესთავაზა.
