ინციდენტი მოხდა რუსეთში, არხანგელსკის ოლქში, პლესეცკის რაიონის სამხედრო პოლიგონზე. კონტრაქტით მომუშავე სამხედრო „კამაზით“ დაეჯახა ახალწვეულების კოლონას. ორი ჯარისკაცი დაიღუპა, 11 კი დაშავდა.
შემთხვევა გუშინ, 27 ოქტომბერს, საღამოს სამხედრო ნაწილის დახურულ პოლიგონზე მოხდა.
გამოცემა ASTRA-ს ცნობით, კონტრაქტით მომუშავე 22 წლის სამხედრო ისრაფილ აბჰერდილაევი „კამაზის“ საჭესთან დაჯდა და პოლიგონის ტერიტორიაზე მოძრაობისას ახალწვეულების 20-კაციან კოლონაში შევარდა. ერთ-ერთი ჯარისკაცი ადგილზე დაიღუპა, მეორე კი – ჰოსპიტალში.
ინციდენტის დროს მსუბუქად დაშავდა 11 სამხედრო, ყველა მათგანი ამჟამად ქალაქ მირნის სამხედრო ჰოსპიტალშია გადაყვანილი.
მომხდარის მიზეზებზე რუსეთის თავდაცვის სამინისტროს ინფორმაცია არ გაუვრცელებია. კომენტარზე მედიას უარი უთხრეს მირნის სამხედრო პროკურატურაშიც.
___
ფოტო: მედუზა
