რუსეთის თავდაცვის მინისტრი NATO-ს ქვეყნების დაშინებას და უკრაინისთვის სამხედრო დახმარების შეფერხებას ცდილობდა, რადგან რუსეთი მუდმივად განიცდის მარცხს ბრძოლის ველზე და, სავარაუდოდ, წლის ბოლომდე დასავლეთ ხერსონსაც „დაკარგავს“ – ასე აფასებს ომის კვლევის ამერიკული ინსტიტუტი (ISW) სერგეი შოიგუს განცხადებებს უკრაინის მხრიდან „ბინძური ბომბის“ გამოყენების საფრთხეზე.
ინსტიტუტის უახლეს ანგარიშში ნათქვამია, რომ 23 ოქტომბერს შოიგუმ NATO-ს ქვეყნების სულ მცირე სამ თავდაცვის მინისტრს დაურეკა, კოლეგებს საფრანგეთიდან, დიდი ბრიტანეთიდან, თურქეთიდან და უმტკიცებდა, რომ უკრაინა „ბინძური ბომბის“ გამოყენებით პროვოკაციას გეგმავდა.
პარალელურად, ამავე ცრუ და უსაფუძვლო განცხადებას იმეორებდნენ რუსეთის საინფორმაციო საშუალებები. რუსი პროპაგანდისტების ვერსიით, უკრაინა გეგმავს „ატომური ბომბის აფეთქებას“ თავის ტერიტორიაზე, რათა მასობრივი განადგურების იარაღის გამოყენებაში რუსეთი დაადანაშაულოს და მთელი მსოფლიო მოსკოვის წინააღმდეგ განაწყოს.
ISW-ი იქვე დასძენს, რომ იმავე დღეს, 23 ოქტომბერს, სახელმწიფო დეპარტამენტის ოფიციალურ საიტზე გამოქვეყნდა განცხადება, რომელშიც რუსეთის „გაფრთხილებას“ სიცრუე უწოდეს აშშ-მ, დიდმა ბრიტანეთმა და საფრანგეთმა.
ინსტიტუტის ექსპერტების შეფასებით, შოიგუს განცხადებები რუსეთის ხანგრძლივი საინფორმაციო კამპანიის გაგრძელებაა. კრემლი ჯერ კიდევ თებერვლიდან ამტკიცებდა, რომ მასობრივი განადგურების იარაღით ე.წ. False flag ოპერაციის განხორციელებაში უკრაინას დასავლეთის ქვეყნები დაეხმარებოდნენ.
აპრილში რუსეთის თავდაცვამ განაცხადა, რომ მოიპოვა ინფორმაცია თითქოს, „რუსეთის დასადანაშაულებლად შეერთებული შტატები გეგმავდა პროვოკაციას ქიმიური, ბიოლოგიური ან ტაქტიკური ბირთვული იარაღის გამოყენებით.“
„ამიტომაც შოიგუს განცხადებები და რუსული სახელმწიფო მედიის ცრუ მუქარები „ბინძურ ბომბზე“, დიდი ალბათობით, მიზნად ისახავს დასავლეთის ქვეყნების შეშინებას, მათ იძულებას, შეწყვიტონ ან შეამცირონ სამხედრო დახმარება უკრაინისთვის, რადგან რუსეთი მუდმივ წარუმატებლობას განიცდის ბრძოლის ველზე და, სავარაუდოდ, წლის ბოლომდე ხერსონის დასავლეთ ნაწილსაც „დაკარგავს“, – წერს აშშ-ის ომის კვლევის ინსტიტუტი.
