უწყების შეფასებით, რუსეთის სამხედრო ხელმძღვანელობის ძირითადი ელემენტები სულ უფრო ნაკლებად ქმედუნარიანნი ხდებიან, ტაქტიკურ დონეზე კი უმწვავეს პრობლემად რჩება უმცროსი ოფიცრების ნაკლებობა.
მობილიზებული რეზერვისტების ორგანიზებასა და ხელმძღვანელობაში არსებული პრობლემების ერთ-ერთ მაგალითად უწყებას 15 ოქტომბერს ბელგოროდის ბაზაზე მომხდარი შემთხვევა მოჰყავს. დაზვერვა ხაზს უსვამს, რომ ინციდენტი, რომლის დროსაც ახალწვეულმა 11 სამხედროს ესროლა, მას შემდეგ დაიწყო, რაც ეთნიკური უმცირესობების წარმომადგენელ რეზერვისტებს ოფიცერმა შეურაცხყოფა მიაყენა.
„ცუდი მმართველობა ქვედა დონეზე, სავარაუდოდ, კიდევ უფრო აუარესებს რუსეთის ძალების დიდი ნაწილის მორალურ განწყობას და არღვევს დანაყოფების ერთსულოვნებას,“ – წერს დაზვერვა 19 ოქტომბრის რელიზში და დასძენს, რომ რუსეთის არმიას პრობლემები მმართველობის ზედა რგოლშიც აქვს.
„ხუთი გენერლიდან ოთხი, რომლებიც უშუალოდ ხელმძღვანელობდნენ სამხედრო კამპანიას თებერვალში, ახლა უკვე გათავისუფლებულია. მათ შემცვლელებს კი ჯერჯერობით ბევრი არაფერი გაუკეთებიათ რუსეთის სამხედრო მოქმედებების გასაუმჯობესებლად“.
უწყების შეფასებით, მმართველობის არათანმიმდევრულობა უფრო მეტად დამანგრეველი იქნება რუსეთის არმიისთვის, ვიდრე ეს იქნებოდა დასავლეთის რომელიმე შეიარაღებულ ძალებისთვის, რადგან რუსული დოქტრინის თანახმად, გადაწყვეტილებას რუსულ ჯარში არა კოლექტიურად, არამედ უშუალოდ მეთაურები იღებენ.
დიდი ბრიტანეთის თავდაცვა უკრაინის შესახებ სადაზვერვო ცნობარს ყოველდღიურად აქვეყნებს. გუშინდელ რელიზში უწყება უკრაინის ტერიტორიაზე რუსეთის მასობრივ სარაკეტო და საავიაციო თავდასხმებს აფასებდა და აღნიშნავდა, რომ რუსეთმა უკრაინის ქალაქები დაბომბვა, სავარაუდოდ, ბრძოლის ველზე წარუმატებლობის გამო გადაწყვიტა.
