უკრაინის თავდაცვის მინისტრის მოადგილის, ანა მალიარის თქმით, ასეთი დავალება მისცეს რუს სამხედროებს კრემლის გენერლებმა. მისი ინფორმაციით, სრულმასშტაბიანი ომის დაწყების შემდეგ, რუსებმა უკვე მეხუთედ წაუყენეს ასეთი მოთხოვნა თავის ჯარებს – გავიდნენ დონეცკის ოლქის ადმინისტრაციულ საზღვრებზე.
„ახლა მათ აქვთ გეგმა, რომ ამ თვის ბოლომდე მთლიანად უნდა დაიკავონ ბახმუტი,“ – განაცხადა მალიარმა.
თავდაცვის მინისტრის მოადგილის თქმით, უკრაინის აღმოსავლეთ ფრონტის სხვადასხვა მონაკვეთზე ახლა სხვადასხვაგვარი ვითარებაა, თუმცა მძიმე ბრძოლების ეპიცენტრად კვლავაც ბახმუტი რჩება.
მალიარი დასძენს, რომ დონბასში უკრაინის შეიარაღებული ძალებიც განაგრძობენ წინსვლას, თუმცა რუსები შეტევებს არ წყვეტენ.
როგორც უკრაინული მედია აღნიშნავს, რუსეთში უკვე დაიწყო პროპაგანდა, თითქოს ლიმანისა და ბახმუტის მიმართულებებზე რუსეთის არმიამ წარმატებას მიაღწია და ბახმუტის გარშემო რამდენიმე დასახლებული პუნქტი აიღო.
„იქ ძალიან მძიმე ბრძოლები მიდის, მოწინააღმდეგეს თავმოყრილი ჰყავს თავისი ყველაზე ძლიერი ძალები, თუმცა უკრაინის დამცველები მათ წინ წასვლის საშუალებას არ აძლევენ,“ – უთხრა ჟურნალისტებს უკრაინის შეიარაღებული ძალების აღმოსავლეთ დაჯგუფების ხელმძღვანელმა სერგეი ჩერევატიმ.
დაახლოებით ერთი კვირის წინ დიდი ბრიტანეთის დაზვერვა წერდა, რომ სამხრეთსა და ჩრდილოეთში უკრაინელთა კონტრშეტევის მიუხედავად, რუსეთი კვლავაც პრიორიტეტს ანიჭებს თავის შეტევით ოპერაციას დონბასის ცენტრალურ სექტორში, განსაკუთრებით კი ქალაქ ბახმუტთან.
დაზვერვის ვარაუდით, რუსეთის არმიას აქვს კონკრეტული ბრძანება, ფრონტის ამ მონაკვეთზე ოპერაციულ წარმატებას მიაღწიოს. გარდა ამისა, უწყება აღნიშნავდა, რომ ბახმუტის ბრძოლებში აქტიურადაა ჩართული კერძო სამხედრო კომპანია „ვაგნერი“, რომლის დამფუძნებელი ევგენი პრიგოჟინი საკუთარი რეპუტაციის გადარჩენას და გამყარებას ცდილობს.
