შუახევის მუნიციპალიტეტის მთა ჩირუხში ორხაზოვანი ზიპლაინის მშენებლობა იგეგმება, რისთვისაც აჭარის ბიუჯეტიდან 6 მილიონზე მეტი ლარია გათვალისწინებული. ზიპლაინის მინიმალური სიგრძე 1 752 მეტრი უნდა იყოს.
„პროექტის მიზანია ჩირუხის, როგორც ტურისტული დანიშნულების ადგილის პოპულარიზაცია. ზიპლაინი იქნება ერთ-ერთი ყველაზე გრძელი ზიპლაინი ევროპაში. ზედა სადგური დაპროექტებულია როგორც „არწივის ბუდე“, საიდანაც იშლება პანორამული ხედი ხეობაზე. ქვედა სადგურის პროექტში ინტეგრირებულია ტურისტულ-ვიზიტორთა ცენტრი“, – აღნიშნულია დოკუმენტებში.
ზიპლაინი, ჩირუსის მთა / ზედა სადგური/ რენდერი კონცეფციიდან
ზიპლაინის საპროექტო-სახარჯთაღრიცხვო დოკუმენტაციის მომზადებასა და მის საფუძველზე მშენებლობის სახელმწიფო შესყიდვაზე ტენდერი აჭარის ფინანსთა და ეკონომიკის სამინისტრომ 6 752 200 ლარით უკვე გამოაცხადა.
სამინისტროს ინფორმაციით, „ზიპლაინის მოწყობაზე ჩატარდა ბაზრის კვლევა, რომელშიც მონაწილეობდნენ როგორც ადგილობრივი, ასევე უცხოური კომპანიები“.
ზიპლაინი, ჩირუხის მთა / რენდერი კონცეფციიდან
მთა ჩირუხში ზიპლაინის სამშენებლო-სამონტაჟო და საინსტალაციო სამუშაოები 2024 წლის 2 ოქტომბრამდე უნდა დასრულდეს; ტენდერში წინადადებების მიღება კი 2022 წლის 2 ნოემბერს დაიწყება და ხუთ დღეში, 7 ნოემბერს დასრულდება.
ტენდერის ტექნიკური დავალებიდან:
- „საწყისი საპროექტო კონცეფციის მიხედვით, ზედა (სიმაღლე: ზღვის დონიდან 2 496 მეტრი) და ქვედა (სიმაღლე: ზღვის დონიდან 2 063 მეტრი) სადგურების ადგილმდებარეობა შერჩეულია და ზიპლაინის სიგრძე შეადგენს 1 752 მეტრს. მიუხედავად ამისა, შერჩეული ადგილმდებარეობები არ წარმოადგენს საბოლოო წერტილებს და მათი ცვლილება დასაშვებია.
- სამინისტროს მიერ შერჩეულ იქნა ალტერნატიული ტერიტორიები და მიენიჭა მათ პრიორიტეტი, თუმცა თუ აღნიშნული ტერიტორიები ტექნიკურად გამოუსადეგარია, კონტრაქტორს უფლება აქვს შეცვალოს ადგილმდებარეობები.
- ადგილმდებარეობების შერჩევა უნდა ეფუძნებოდეს შემდეგ პრინციპებს: ადგილმდებარეობები უნდა შეთანხმდეს დამკვეთთან; ტერიტორიები უნდა იყოს გეოლოგიურად მყარი და არ გააჩნდეს მნიშვნელოვანი სამშენებლო სირთულეები; ზედა სადგურიდან უნდა იშლებოდეს პანორამული ხედი ხეობასა და მიმდებარე ტერიტორიაზე; ქვედა სადგურის განთავსების ადგილი დაიგეგმოს მოხერხებული სატრანსპორტო ხელმისაწვდომობის გათვალისწინებით;
- ქვედა სადგური, ამავე დროს როგორც ტურისტულ-საინფორმაციო ცენტრის ფუნქციის მატარებელი ობიექტი, განთავსდეს არსებულ დასახლებასთან ინტეგრირებისა და ფუნქციური გამოყენების გათვალისწინებით, ვიზიტორთათვის მარტივი მისაწვდომობისა და აღქმულობის პრინციპების უზრუნველყოფით.“
ზიპლაინი, ჩირუხის მთა / ქვედა სადგური / რენდერი კონცეფციიდან
დოკუმენტების მიხედვით, ჩირუხის ზიპლაინის [„არწივის ბუდე“] გეგმა-კონცეფცია შპს „არტ სტუდიო პროექტის“ მიერ არის მომზადებული.
თუმცა, „საჭიროების შემთხვევაში ტენდერში გამარჯვებულის მიერ შესაძლებელია საპროექტო დოკუმენტაციის შედგენის დროს, სამინისტროსთან შეთანხმებით, „არტ სტუდიო პროექტის“ მიერ შედგენილ სადგურების პროექტში ცვლილებების შეტანა [მათ შორის ზედა სადგურზე საპირფარეშოს მოწყობის გათვალისწინებით], ძირითადი კონცეპტუალური გადაწყვეტის შენარჩუნებით. პროექტირებისას გათვალისწინებულ უნდა იქნას ადგილობრივი გარემო და კლიმატური პირობები“.
განახლება: ეს ტენდერი არ შედგა – მასში მონაწილეობა არავინ მიიღო.
