“რუსეთი ტერორისტული სახელმწიფოა” – ამ წარწერით გაშალეს დღეს, 10 ოქტომბერს, ბათუმში მყოფმა უკრაინის მოქალაქეებმა საპროტესტო ბანერი და რუსეთის ქმედებები კიდევ ერთხელ გააპროტესტეს.
აქციაზე მისულ მოქალაქეებს იმ ქალაქების სახელები ეწერათ, რომლებიც დღეს დილით უკრაინაში რუსეთის მიერ დაიბომბა.
საპროტესტო აქცია ბათუმში 10.10.2022
დღევანდელი, 10 ოქტომბრის დილა მძიმედ დაიწყო უკრაინაში. აფეთქებების ხმა ისმოდა კიევში, დნეპრში, ლვოვში, ხმელნიცკსა და ჟიტომირში. უკრაინის შეიარაღებული ძალების მთავარსარდლის, ვალერი ზალუჟნის ინფორმაციით, 10 ოქტომბერს რუსეთმა უკრაინაში 75 რაკეტა ისროლა.
დღეს რამდენიმე აფეთქება მოხდა დედაქალაქში, კიევში, სადაც მედიის ცნობით, წინასწარი ინფორმაციით, 8 ადამიანი დაიღუპა და 24 დაშავდა.
რუსეთი უკრაინაში 24 თებერვალს გამთენიისას შეიჭრა და სრულმასშტაბიანი ომი დაიწყო.
