ვლადიმერ პუტინის პრესმდივანი დიმიტრი პესკოვი აცხადებს, რომ რუსეთი აუცილებლად „დაიბრუნებს“ უკრაინის მიერ გათავისუფლებულ იმ ტერიტორიებს, რომლებზეც „რეფერენდუმები“ ჩაატარა და რომლებიც პუტინმა „რუსეთს შეუერთა.“
პესკოვის კომენტარებს რუსული პროპაგანდისტული მედია ავრცელებს.
ჟურნალისტებმა პესკოვს ჰკითხეს, ხომ არ არის შეუსაბამობა პუტინის განცხადებებსა და რეალობას შორის – რუსეთის პრეზიდენტმა განაცხადა, რომ „ტერიტორიების შეერთება“ რუსეთთან – ეს სამუდამოა, მაშინ, როდესაც ამ ტერიტორიებს რუსეთის ჯარები ტოვებენ.
„არანაირი წინააღმდეგობა არ არის, ისინი სამუდამოდ რუსეთთან იქნებიან, ჩვენ მათ დავიბრუნებთ,“ – განაცხადა პესკოვმა და დასძინა, რომ ხერსონისა და ზაპოროჟიეს ოლქები „რუსეთის შემადგენლობაში შევიდნენ“ იმ საზღვრებით, რომლებშიც ამ ოლქებს, შეერთების მომენტში, მათი სამხედრო-სამოქალაქო ადმინისტრაცია მართავდა.
„კიდევ ერთხელ გავიმეორებ, იქ გარკვეული ტერიტორიები დაბრუნდება. ჩვენ განვაგრძობთ კონსულტაციებს მოსახლეობასთან, რომელიც გამოთქვამს რუსეთთან ცხოვრების სურვილს“.
5 ოქტომბერს რუსეთის პრეზიდენტმა ხელი მოაწერა კონსტიტუციურ კანონს, უკრაინის ოთხი ოლქის – ლუგანსკის, დონეცკის, ზაპოროჟიესა და ხერსონის რუსეთის შემადგენობაში მიერთებაზე.
დღესვე უკრაინამ თქვა, რომ უკრაინის არმიამ ლუგანსკის ოლქში რამდენიმე დასახლებული პუნქტი გაათავისუფლა.
წინა დღეს, 4 ოქტომბერს კი, უკრაინელებმა ხერსონში 8 დასახლებული პუნქტი დაიბრუნეს.
„გულწრფელად რომ ვთქვათ, 17 დასახლების დაკარგვა ხერსონის რეგიონში ძალიან შემაშფოთებელია“, – თქვა რუსმა პროპაგანდისტმა და რუსეთის „პერვი კანალის“ წამყვანმა ოლგა სკაბეევამ მას შემდეგ, რაც კოლეგისაგან ხერსონში არსებული ვითარების შესახებ ინფორმაცია მოისმინა.
უკრაინაში შეჭრილი რუსეთის ძალების მდგომარეობაზე, მათ შორის, ანექსირებულ ხერსონში არსებულ ვითარებაზე მსჯელობისას ოლგა სკაბაევამ დასძინა:
„ფრონტზე სიტუაცია ძალიან რთულია. მცოდნე ხალხი ამბობს, რომ ეს მხოლოდ დასაწყისია, იმ გაგებით, რომ მომდევნო 3 კვირა კიდევ უფრო რთული იქნება და უნდა მოვიცადოთ. დღეს თავდაცვის მინისტრმა შოიგუმ თქვა, რომ 200 000 [რეზერვისტი] უკვე მობილიზებულია და ისინი უახლოეს მომავალში აღმოჩნდებიან ფრონტზე.
სავარაუდოდ, შეტევაზე გადავალთ. მაგრამ ახლა ზელენსკია შეტევაზე“.
