თურქეთში ინფლაციის მაჩვენებელი ყველაზე მაღალია ბოლო 24 წლის განმავლობაში. ექსპერტები ამის ერთ-ერთ მიზეზად საპროცენტო განაკვეთების შემცირების პოლიტიკას მიიჩნევენ – ამის შესახებ „დოიჩე ველე“ წერს.
გამოცემა ეყრდნობა თურქეთის სტატისტიკის ინსტიტუტის მაჩვენებლებს.
სტატისტიკის თანახმად, თურქეთში წლიურმა ინფლაციამ სექტემბერში ახალ პიკს, 83,45 პროცენტს მიაღწია, ხოლო ზრდამ 3,08 პროცენტი შეადგინა. ეს არის წლიური ინფლაციის ყველაზე მაღალი მაჩვენებელი თურქეთში 1998 წლის სექტემბრის შემდეგ.
სურსათსა და უალკოჰოლო სასმელებზე ფასების წლიურმა ზრდამ 93 პროცენტი შეადგინა, ხოლო ტრანსპორტის სფეროში ფასები 117,66 პროცენტით გაიზარდა.
თურქეთში ინფლაციას რამდენიმე ფაქტორი განაპირობებს, ერთ-ერთია სუსტი ეროვნული ვალუტა, ლირა.
ფასებზე ნეგატიურად აისახება საერთაშორისო მიწოდების ქსელებთან დაკავშირებული პრობლემებიც, ასევე, ფასების ზრდა გამოწვეულია უკრაინის წინააღმდეგ რუსეთის ომის ფონზე ელექტროენერგიის გაძვირებითაც.
თურქეთში ფასების მატების მნიშვნელოვან ფაქტორად ანალიტიკოსები ასევე მიიჩნევენ თურქეთის პრეზიდენტის, ერდოღანის პოლიტიკას ეკონომიკური ზრდის დაჩქარების მიზნით საპროცენტო განაკვეთების შემცირების შესახებ, რომელიც 2018 წელს დაიწყო.
„მაშინ ერდოღანმა ეს გადაწყვეტილება ცენტრალური ბანკის ხელმძღვანელის რჩევის საწინააღმდეგოდ მიიღო, რამაც გამოიწვია ლირის დაცემა რეკორდულ დაბალ ნიშნულზე. მას შემდეგ პრეზიდენტმა ცენტრალური ბანკის 3 ხელმძღვანელი გაათავისუფლა“ – წერს „დოიჩე ველე“.
