რუსეთის უშიშროების საბჭოს თავმჯდომარის მოადგილე, დიმიტრი მედვედევი აცხადებს, რომ უკრაინაში რუსეთის მიერ „გათავისუფლებულ“ ტერიტორიებზე რეფერენდუმების ჩატარება აუცილებელი და სასწრაფოა „ისტორიული სამართლიანობის აღსადგენად“ და მსოფლიოში „შეუქცევადი გეოპოლიტიკური ტრანსფორმაციის დასაწყებად.“
მედვედევმა თავისი პოზიცია ტელეგრამზე გამოაქვეყნა.
„რეფერენდუმებს დონბასში უდიდესი მნიშვნელობა აქვს არამხოლოდ ლუგანსკისა და დონეცკის რესპუბლიკებისა და სხვა გათავისუფლებულ ტერიტორიებზე მცხოვრები ადამიანების სისტემური დაცვისთვის, არამედ ისტორიული სამართლიანობის აღსადგენად.
ისინი (რეფერენდუმები) მთლიანად შეცვლის ათწლეულების განმავლობაში რუსეთის განვითარების ვექტორს. და არამხოლოდ ჩვენი ქვეყნისას. მათი ჩატარების და ახალი ტერიტორიების რუსეთთან შემოერთების შემდეგ, მსოფლიოში გეოპოლიტიკური ტრანსფორმაცია შეუქცევად ხასიათს მიიღებს.
რუსეთის ტერიტორიის ხელყოფა – დანაშაულია, რომლის ჩადენაც თავდაცვის ყველა ძალის გამოყენების უფლებას იძლევა. მაგრამ არანაკლებ მნიშვნელოვანია, რომ ჩვენი ქვეყნის კონსტიტუციაში ცვლილებების შეტანის შემდეგ, რუსეთის ვერცერთი მომავალი ხელმძღვანელი, ვერცერთი პასუხისმგებელი პირი ვერ შეძლებს ამ გადაწყვეტილებების უკან დაბრუნებას.
ამიტომაც ეშინიათ ამ რეფერენდუმების ასე ძალიან კიევში და დასავლეთში. ამიტომაცაა აუცილებელი მათი ჩატარება,“ – წერს დიმიტრი მედვედევი.
აშშ-ის ომის კვლევის ინსტიტუტის დღევანდელ ანგარიშში ნათქვამი იყო, რომ უკრაინელთა კონტრშეტევები კიდევ უფრო აქვეითებს რუსეთის არმიის ისედაც დაბალ მორალურ განწყობას და კრემლის გავლენიან პირებში პანიკას იწვევს, რის გამოც მოსკოვში ძალიან გააქტიურდა მოწოდებები „რეფერენდუმების“ ჩატარებაზე.
