იმ პირებს, რომლებიც უკრაინის დროებით დაპყრობილ ტერიტორიებზე ოკუპანტებთან თანამშრომლობდნენ, რუსეთში გაქცევას ურჩევენ. ამის შესახებ უკრაინული მედია ინფორმაციას, ენერგოდარის მერზე, დმიტრო ორლოვზე დაყრდნობით ავრცელებს დღეს ავრცელებს.
„დღეს ენერგოდარში ოკუპანტებმა თავიანთ საინფორმაციო რესურსების მეშვეობით გაავრცელეს განცხადება, რომლის მიხედვითაც, ეგრეთ წოდებული დონეცკისა და ლუგანსკის, ასევე სხვა ოკუპირებული ტერიტორიების მცხოვრებლებს რეკომენდაციას უწევენ „ვითარების დაძაბულობიდან გამომდინარე“ რუსეთის ფედერაციაში გაემგზავრონ. მათ გარკვეული სახის საინფორმაციო დახმარებასაც სთავაზობენ“, – აღნიშნა დმიტრო ორლოვმა.
„პირველი შემთხვევაა, როცა ძნელია არ დაეთანხმო, რომ ეს მიანიშნებს მათი მხრიდან საღი აზრის ქონაზე – მოღალატეებს ვურჩევთ ისარგებლონ რუსეთის ფედერაციის სამხედროების მოწოდებით, რომლებიც მალე იმავე მიმართულებით გაიქცევიან. თქვენ მხოლოდ ორი ვარიანტი გაქვთ: ან გაიქცევით, ან დაელოდეთ უკრაინის შეიარაღებული ძალების მოსვლას და პირადად შეხვდით ჩვენს დამცველებს“, – ხაზგასმით აღნიშნა ორლოვმა.
როგორც უკრაინული გამოცემა „უნიანი“ წერს, ხარკოვის რეგიონში უკრაინის შეიარაღებული ძალების წარმატებული შეტევის შემდეგ, რუსეთის ხელისუფლებამ „გადადო“ რეფერენდუმის ჩატარება, რომლის შედეგადაც უკრაინის ოკუპირებული ტერიტორიები „რუსეთს უნდა შეერთებოდა“.
უკრაინული მედიის ინფორმაციით, რუსეთის პრეზიდენტმა, ვლადიმერ პუტინმა უკრაინის ოკუპირებული რეგიონებიდან სასწრაფო წესით გაიწვია რუსი „პოლიტტექნოლოგები“, რომლებიც რეფერენდუმის მომზადებაზე მუშაობდნენ.
ბოლო სამი დღის განმავლობაში, უკრაინამ 3 000 კვადრატულ კილომეტრზე მეტი ოკუპირებული ტერიტორია დაიბრუნა. უკრაინის არმიას განსაკუთრებული წარმატება ხარკოვის რეგიონში აქვს. შეტევა გრძელდება სხვა მიმართულებებზეც.
